يا الله يا اللي خيرة الناس تنصاه=لا ضاقت الدنيا علينا نصيته
تفرج لحال اللي على الطيب مبداه=اللي مع الاجواد معروف صيته
دنياك لا سارت على غير مشهاه=من غير ذنب(ن) في حياتك جنيته
أعرف ترا الدنيا دنيه وملهاه=وما قدر المولى عليكم خذيته
ولا تمشي الدنيا على ما تمناه=ما فادكم لا قلت ليته وليته
أحد يعيش بدار غرب(ن) ويهناه=واحد(ن) غريب الحال في وسط بيته
شىء مجرب واكثر الناس تلقاه =وأنت بعد عقب التجارب لقيته
والضلع اللي متعب الرجل مرقاه=حفيت رجولي وكل ضلع(ن) رقيته
والصاحب المخطىء ترانا عذرناه=لا هزني شيطان نفسي عصيته
وإليا نساني صاحبي ما تناساه=مهما يقاطعني على الود جيته
ندمح له الزله على طيب ذكراه=حيثه عزيز (ن) بالردى ماهقيته
حيثه مقر الطيب والطيب مجناه=له فزعة(ن) بالطيب لو ما نخيته
تم الجواب وزبدة الهرج معناه=وأختامها بأول كلامي بديته