ماني غني عنكم ولا أود حاجه=ولا أنتم يا أهل دخنة لكم حاجة بي
الا إذا ما الوقت ثارت عجاجه=و أرزم رعدها واختلط حي مع ني
لو الله الا الحر يوقد سراجه=لو ما باقي له في حياته ولا شي
أما يعيش العمر في ابتهاجه=والا لعله ساعةٍ ما بقي حي
قصر الكلام إن كان فيه انبلاجه=في وقت حر يفز لا قلت له حي
بارسل سلامي لنور حرفي وتاجه=اللي لحرب ليا دعت حاجته ضي
طلق المحيا من يسرك حجاجه=طاوى وساع البيد عن عزوة طي
لافي حمود القرم عالي سياجه=مناقبه لا قلت لك هي قُلْ هي
ما يكترث باللي يروم اللجاجة=ولا يجاري اللي يلوي البينة لَي
منه دواه الطيب عنده علاجه=ومنه دواه الكي ما يخطي الكي
عن كل حرب يذب وقت المواجه=مايقول ذي فيهم ولا يقول ذي فِي
ولا يقول كلٍ يدرق اللي يواجه=ولا يقول حلقي بس من دونه يدي
عزيز من له ربع ماهي هجاجه=تروي عطاش البيد بأفعالها ري
وعزاه منه صالي الوقت شاجه=وأفنى حياته كلها ما لقي فَي