ياهاجسي غوص في غبات الابحار = وقبض يمينك على الدرة وصدها
جيب الثمينه وخل الناس تختار = خل النشاما تجي وتمد يدها
نوادرن غاليه من جود الافكار = يقنع بها العاقل اللي قد وجدها
من رحلة العمر ابعطي بعض الاخبار= سوالفٍ ثابته معها سندها
يوم الليالي عطتنا بعض الاسرار = ابكشف السر للي مانشدها
ابقطف ازهار واترك بعض الازهار= مقدر على حصرها ماحصي عددها
الاوله صون دينك سر وجهار = صلاتك الواجبه دوم اعتمدها
امسك طريق الهدى لايمين لايسار = حافظ على المله السمحه وفدها
والثانية طيعني خلك لهم بار = ابذل لهم جهد روحك مع جسدها
ابوك وامك لهم حقٍ ومقدار = تبيت يدين السقيم اللي جحدها
والثالثة لاتجي للهرج سمسار = ناسٍ تصبح لها وناس تهجدها
الهرج لاتنقله من دار في دار = وتخرب ابيوت وتهدم عمدها
والرابعة لاتدور زلة الجار = احرص على هيبة الجيران زدها
عن حرمة الجارصد وغض الابصار= لو شفت لك زبدةٍ بين شهدها
خله بعينك كما ضلعان سنجار = لو كنت تبغى علومن يفتقدها
والخامسة خوة الطيب لها اذكار = بين العرب سيرتك كلن حمدها
احرص على خوة الوافين الاخيار = عشرة هل الطيب يبدا لك سعدها
والسادسه يافتى صلفات الاقدار = لاتشتكي ضيمها يكبر نكدها
اصبر ترى الصبر له حكمه ومعبار = لابد من ليلةٍ تسمع رعدها
والسابعه لابغيت تروح مشوار = انظر وش اللي كسبته من بعدها
كم رحلة ماوراها غير الاخطار = احسب حساب الخطاوي وقتصدها
والثامنه من يخون العهد غدار = من يوعد الناس ويغير عهدها
هذاك منبوذ عند الناس مكار = مذموم بالمجتمع نفسه قردها
والتاسعه للقناعه تاج وشعار = يحصل على تاجها شبلٍ قصدها
لاتقول ياليتني حطمت الاسعار = اللي عطاك الولي لاتنتقدها
والعاشرة كان تبغى كبح الاضرار = العلم سيف الفتى في كل بدها
العلم يرفع مقامك بين الاقطار = يحميك بالاوله واللي بعدها
جتك العلوم الثمينه لد الانظار = لاتشوم عنها وترجع في صددها