يابنت حواء صار لك مركز وشان =رحب بك العالم بشرقه وغربه
قصيدتي ماهي حقورن ونقصان =وماني مبطنها بنقدن وسبه
وكلن على ماقيل ممسوك بلسان =عند العرب ولا يجازيه ربه
حنا تعبنا يالرجاجيل لازمان =ومن التعب بالراس دق المنبه
والراحه تطفش اذا مرت ازمان =والسيخ يصدى لو عليه الف صبه
هاذي مصانع تنتظركن ببيبان =مفتحه بكل شوق ومحبه
وهاذي عماير وقفت عند سيسان =تبي سواعدكن تشمر بهبه
يبيلهن تكميل مع صب خزان =ارمن ابو الفصفص وقشره ولبه
وهذا قنص قمري ودخلن وسمان =مركزاتن له بضلعن وتبه
ثم ارأسن واستقون بكل شيطان =على الضعيف والقدر لالعبه
وانذار بعد انذار دايم واحيان =ان غاب او ماغاب او تاه دربه
والاجتماع يصير دونات واصيان =مع كيف بالفنجال رجلن يصبه
والعلك مرصوصن باشكال والوان =واوضاع زينه دايم ومستتبه
وانته ياخو اطعم حلالك من الضان =فت العلف واملا من البير دبه
واسرح بذودك من مهازيل وسمان =وجيب الحليب ان كان تعرف تحلبه
واحرص على عيالك يجي اي نقصان =واما الصغير ويلك ان فات شربه
وباب المدينه كله اسوار واحصان =وياشيب راسك لو طرالك تطبه
يابنت حوا صار لك مركز وشان =مبروك من ادم ومن كل قلبه

يمكرم الضيفان مامنك حقران = والآدمي يفهم من الهرج لبه
مير البلى منهو كتبنا بهالشان = ميدري انه محاسبن عند ربه
لاتحسبنا فرحنا يوم الخبر بان = والارفعنا على اخونا بحبه
لاوالله الي ضاعت حقوق الانسان = من يوم شاع الخبر من مصبه
وانا ادري ان فرحتك تدوي بالاركان = وودك تبينها وتخاف المسبه
حواء تبي تطلبك شيءٍ علشان = ترقد وترتاح وتطفي المنبه
عطها القياده وانت غمض هالاعيان = وقبل لاتطلع للوزاره تنًبه
تكفى ياادم الغدى ابيه بطران =والا الملابس لغسيله تكبه
والليله عندي اجتماعن بلبنان = يعني صريحه ورعك اليوم ربه
يمكرم الضيفان وش خل الاوزان = طغت علينا العلمنه والتشبه
هذا الامر نرفضه لو كان ماكان = قالو تقدم وانا اشوفه مكبه
أية تقدم جابه انسان مرضان =ليله مانامه عاجزن فيه طِبه
وينه عن السنه وماقاله القران =على لسان المصطفى وقول ربه
ان المره في بيتها قدر الامكان =تحفظ كرامتها عن اللي يسبه
وختامها ياادم لك الشكر عرفان =حواء تنازل عن الشقى لك محبه