انا يابو سامي كل ماذعذع النسناس=وهبت نسائم من شذى الصبح شرقيه
طرت لي طواري قام يطرق بي الهوجاس=معدل انبيره فوق تسعين بالميه
على اللي عناده لويعاند عسل ياناس=وياويل عيسى منه لارحم ابوحيه
حروف القوافي صورن صادق الإحساس=تجاهه وانا قلبي معه مخلص النيه
ومن الصعب تحديد المشاعر على قرطاس=لو ألفت من فكري ثلاثين دوسيه
ولكن رؤس اقلام والود ماينقاس=ولو جيبت احدث وحدة قياس رقميه
فدتها الجواهر مع عقود الذهب والماس=سعودية من نجد بارض حساويه
وتم الكلام ويانداء قفل الاقواس=وتغاضى عن الزله تراها كيبورديه

انا لاتناسيت القصايد ترن اجراس=تحرك هجوسٍ داخل القلب مخفيه
تجي لي قصيدة شاعرٍ فاهمٍ نبراس=مثل صاحبي عيسى وتخلف طواريه
ياعيسى قصيدك يعجب الشاعر الحساس=تحوف القصيده حوف فنجال بريه
ولكن حصلك ماحصل ياعسى ماباس=من العام تشكي لي هوى هالسنافيه
حساويةٍ من بعدها صاربك وسواس=وش المشكله ياجعل ماهي بشيعيه
مادام الحبيب اللي تحبه طليق الراس=ترى ماتزال بيوت الامال مبنيه
عناده طبيعي ياصحيبي ولابه باس=دليل الثقه في رايه وقو شخصيه
وترى البعد ياعيسى مايمنع قوي الباس=لاتحْسب تكاليف العنى روحه وجيه
توكل على الله لايخيم عليك الياس=وانا معك في مالي وجاهي وبيديه