المشاركة الأصلية كتبت بواسطة حفيد الحجيري

السلام عليكم ورحمة الله وبركاته

كل عام وانتم بخير ومن العايدين جميع

هذي المجالسيه كتبتها يوم الخميس بتاريخ 3/10/1432هــ بمناسبة ملتقى العيد السنوي لفخذ

( الحجوره ) من قبيلة بشر من حرب والقيتها في يوم الجمعه 4/10/1432هــــ

* ملاحظه
لا يعني امتداحي لقبيلتي ، انتقاصي من الآخرين
الجميع على راسي من فوق والقبايل الاخرى والفخوذ الاخرى ما فيها قصور
اترككم مع النص علّه ينال استحسانكم ،،،،،،،،،

البارحه تشكلتّ بيض الأوراق=في صورة أنثى حسنها بالبني فاق
وصارت تثنّى لين حرفي لها راق=وقامت تحاورني كهدهد سليمان

قالت سلام وقلت يا مرحبابك=ياللي على كفك نقشتي خضابك
قالت يا وجه الخير لا ترد بابك=قلت اِقلطي واخذي من الكيف فنجان

قالت يدوم اِلك البقا وقبل ما أقلط=بأسألك لكن فوق ضيفك ، ما تشرط
قلت الثلاث أيام يا ضيفنا شرط=في سلمنا وما زاد عنها بالأمكان

قالت قبلت وبنتوكل على الله=ياللي حروفك شوّقتنا لك الله
قلت ابتدي خير البدايات بالله=قالت بذكره نبتدي ، واِسمع الآن

اِنت منين ، وقلت من حرب من حرب=قوماً لنا تشهد هل الشرق والغرب
الأوله من قسمنا ، سلم أو حرب=يشهد لنا القاصي ويشهد لنا الدان

في وصفنا ما يوفي الحرف والقيل=رجّال واحد منّنا عن رياجيل
ما نبخس العربان ما نقبل الميل=لكن قول الحق ما فيه حقران

قالت صدقت وحرب ماهي قبيله=دوله وسط دوله وفيكم قليله
قلت اِسألي عنّا السيوف الصقيله=تلقين بصمة حرب في كل ميدان

قالت بكم والنعم والسبعة أنعام=يامن عجز في وصفكم حبر الأقلام
لكن يا ضرغام يا نسل ضرغام=حرب اسمك الأول ، ونبغى اسمك الثان

قلت ابشري دامك سألتي عن اسمي=فالنايفه يا بنت الأجواد قسمي
من بشر شوكة حرب مشهور وسمي=واللي ما يعرف بشر خسران خسران

ما بين مكه وطيبه مقيمين=نحمي مواقفنا على العسر واللين
عون القريب و سقم كبد المعادين=ميزاننا يرجح على كل ميزان

على سلوم أهل الطويله ربينا=وإن دقت أجراس الخطر ما انثنينا
وقت الله كافيتنا يدينا=ما نبني ألا بنينا فوق سيسان

قالت ما فيكم شك ، ما منكم قصور=ياليتني من بشر وأجدادي بشور
قلت الظلام يزول مع فجّة النور=والحق ما يحتاجله زود برهان

قالت عرفنا الأصل والفرع لكن=باقي لنا اِستفسار اِذا وقتك أمكن
قلت ابدي اللي وسط الأضلاع بك كن=قالت من أيّة بشر يا ذرف الأيمان

قلت الجواب يقول : حنّا الحجوره=فريّسنا فالماد مثل النموره
مثل الدوا للجرح وقت الضروره=آلاد حجر لبشر منصى و عنوان

بالضيف لامنذه لفانا نهلي=من واجبه ما ينقصه قدر ملي
ما نزلّ ، بس اللي علينا يزلي=نقرا عليه الفاتحه ، كنّ ما كان

تاريخنا ما دونته الدفاتر=اللي محاورها نقاش الدكاتر
تاريخنا بين القبايل واتر=على جباه خصومنا فعلنا يبان

قالت لك ما نجاملك يالذيب=وإنّ اسمكم ناف الحجا والمراقيب
قلت الحقيقه شمس لو إنّها تغيب=تبدي ويجلى كل زورٍ و بهتان

قالت سؤال وقلت روحي لغيري=قالت طلبتك يا حفيد الحجيري
آخر سؤال يكنّ داخل ضميري=ويش اسمك اللي نزهمك فيه يا فلان

اسمي حسن ولد الحجيري بلا فخر=ولد الكريم اللي لمن يعرفه ذُخر
اللي بفعله ناحت اسمه على الصخر=درع القبيله دونها قاضي الشان

قالت تشرفنا بكم يالأجاويد=عايد ربوعك باسمنا دون تحديد
وإن طال عمري وعدنا ملتقى العيد=اِثنعش ميلادي من العام ألفان

ختامها يا عزوتي يا حزامي=تمت حروفي بالوفا والتمامي
ما باقي إلا ذكر سيد الأنامي=صلّوا على المرسول في خير الأديان