صباح الخير يانور الصباح وسلوة المشتاق= تحريتك قبل نور الصباح تبين فروعه
تحريتك وقلبي مانسى حبك وصدري ضاق=أهدي خافقاً ماهدت الايام من روعه
نسيت اني نسيت أنسى غرامك لين همك واق=على قلباً مادونه غير شبر ستار وضلوعه
تبي تابس غصون الخافق وينحت منه أوراق=عقب هاك الغياب اللي انت تدري ويش موضوعه
تحملت الهموم اللي على قلب الشقا تنساق=هموماً في حنين الوجد والاهات متبوعه
بغيت الصبر لكني لقيت الصبر ماينطاق=عن أغلى من عشقته بالوجود وغير طبوعه
جميلً يملك انواع الجمال وياسر الأذواق= تواصيفاً تسمى في مفاهيم العرب روعه
يسوق الغيم في عكس اتجاه الريح والبراق=تكاشف في خدوداً من ورود الحسن مزروعه
عطاه الله جمالاً تنحني من شانه الاعناق=يميل هامتا بالعز والتقدير مرفوعه
ألا سبحان من صور جماله ربه الخلاق=تقول ان الجواهر منه ماخوذه ومصنوعه
تفتح له زهور الورد وتصير الكهوف آفاق=وانا فتحت قلبي ياجميل الوصف موسوعه
كتبت الك القصيد اللي يحرك هاجس العشاق=فرايد مفرداتاً في جبين الشعر مطبوعه
أسابق مع مقابيل الليالي والليال سباق=حداني بالزمان اللي حدى العاقل على دموعه
تحريت اللقى بنص الطريق ولاهقيت افراق=ولكن مالقيت الا الهموم وصدمة اللوعه
صباح النور يانور الصباح بحزة المشراق=تحريتك قبل نور الصباح تبين فروعه