ماعاد باقي في يدينا وسيلة=ولا عاد باقي فأزمنتنا مساحه
كل الفرصه متلاشيه يالجميلة=كل ماأجيه أعزل رفع لي سلاحه
وكل ما ألمح بوادر عقيله=وأقول ياااااالله وأبشروا بالفراحه
كني أخيل البرق جوف المخيله=أقبل وهبت ريح وأنكف مراحه
وحسب قياس الوقت ماهي طويلة=لحظت ينوض البرق ويرفع وشاحه
لحظه عطتني اليأس وأخذت بديله=أعيشها بين البقا والإطاحه
جاحد بمفهوم الامل من حصيلة=لجله تركني جسم مثخن جراحه
حاسس مفاهيم السعادة دخيله=وإيماني زايد في قانون الإزاحه
فكلما كانت مشاعر مهيله=يترجم الاخرس لها بالمناحه
يعني شقلك بس! ... من قل حيله=كني طلبت من التعب استراحه
وكني أحلي شجرة الحنظليلة=زحمة مراكب وانعدام الملاحة
ثنتين تبقى وغيرها المستحيلة=هذي الصراحة كان تبغى الصراحة
الصعب للمضطر أخر وسيلة=خل انغلاق المجتمع وانفتاحه
والاولى بالمؤمن فؤاده دليله=كل ما اذكرك يعلن فؤادي انشراحه
يفرح لوهله بعدها لاتعني له=لا الليل ليله ولا صباحه صباحه