السلام عليكم ورحمة الله وبركاته
أيها المتصفح الفاضل يطيب لي ويسعدني أن أضع أمام ناظريك هذه الأبيات المتواضعة
التي كلي امل بأن تحضى بالقبول والإستحسان وأن ترقى إلى مستوى ذوقك الرفيع
أقول فيها :
ياللي ملكت بباب الإبداع تشليح=وأخذت في ميدان الوغى ربع جوله
للإنتخاب إسلوب وأصوات ترشيح=بدافع ثقة برنامجه صوّتوله
ما كل باب ٍ يفتحنه مفاتيح=ولا كل ما هاوزت شي ٍ تطوله
الناس فيها وجيه تذكر مفاليح=حيث إنها بالطيب تملك عموله
ووجيه تذكر كل ساعه مكاليح=أهل الوجيه اللي تسمــّـى مغسوله
واللي قنت بأول صلاة التراويح=في بدعته خالف مناهج رسوله
لو كان مضــّـى تالي الليل تسبيح=فعله هبا ً منثور واضح ميوله
يوم الخطأ يحتاج وقفه وتصحيح=نفس ٍ تمادى به تعيش معزوله
والله يكافينا الخطأ والمشافيح=اللي بنوا من سبـّـق الهرج دوله
أهل الدعاوي الباطلة والمباجيح=اللي تسمع للكلام وتقوله
عند اللزز مشوارهم فيه تصفيح=لاجاء النهار اللي تقرع طبوله
هذا وأنا علمي بليا ضحاضيح=إليا إنزعج كل الرجال إحسبوله
علم ٍ شهوده بالرجال الطحاطيح=مثبت وبأية وجه يلقى قبوله
مافيه تطفيف ٍ ولا فيه ترجيح=وكل الرجال العارفه وقــّّعوله
من لا خسر ماذاق حلو المرابيح=يذوقها ويشوف دافع فضوله
ياللي تكن الهيل وتبهر الشيح=كل ٍ يدســّــم شاربه من فعوله
عندي حدب لا مَرْ روس المدابيح=يرتاع من يمشى على القاع طوله
وإلا العصا لجل الكلاب النوابيح=وأكبر عقور يهابها لا إنبحوله
والصبح يجلي ظلمة الليل وتزيح=يجلاه ربي بالنهار ويزوله
واللي يبي يرقى بروس اللواليح=ودّه ولا كن ماتجي بالسهوله
حاديه لهضاب ٍ حصاها صلافيح=فيها ركز راد النصيب مخيوله
دخل بها متأمل ٍ هبة الريح=حافي قدم يبغى يحوز البطوله
معه الخريطه للدروب السواميح=من ربعه اللي بالغشش صفقوله
ربع ٍ تتوق بغيبته للتصاريح=ما همهم وليا حضر ما حسبوله
أول نهاره ياقف شوي ويطيح=يبغى العوافي بس ما هي بحوله
وأتلاه قام يحسب الوقت ويصيح=خايف من الضيعه ترافق نزوله
من عقبها جايز يكب المراويح=كانه سلم منها على دور حوله
مايرتكي للحمل غير الزحازيح=وإلا الرخاء كل ٍ تدرهم ذلوله
إن ما ظهرت له قلب ماله مشاويح=ماهو مفرّق مخرجه من دخوله
مستنبط المبهم من العلم تلميح=وراع الدليل يثبــّـت الحق قوله
والحق واضح ما يبي زود توضيح=واللي سرت معلوم غير معقوله
والله جعل ليل الدّجاء له مصابيح=زينه وللي تاه درب ٍدلوله
طير ٍ ورزقه من يدين الفلاليح=ولا كل عقده بالزمان محلوله
وسلامتـــــــــــــــــــــــــكم
الله يسلمك وصح لسانك
قصيدة في منتهى الروعة والابداع
تحياتي