طابت من الدنيا ترى المر ذقناه = اخر مطاف الناس لبنن وطينه
بيتن مقفل داخل الارض مبناه = رشو ترابه من ورى ساكنينه
حتى ملوك الارض لابد تنصاه = محدن يغير سير ممشى السفينه
واللي تكبر صاحب المال والجاه = حطو على قبره حجرتين زينه
ونبكي على المرحوم نبكي وننساه = كم واحدن يدفن وينسى دفينه
عزي لحال اللي يكافح بدنياه = لفه فراش الموت وضاعت سنينه
لفه قبل مايشوف ماهو تمناه = راح العمر ماشاف ناتج يدينه
ماهو مع اهل الخير يذكر بمسعاه = ممشى طريقه بالخطا خابرينه
ويلاه يادنيا رديٍه واويلاه = فيكي نذوق الوقت زينه وشينه
والشاعر اللي لحًن القاف بالاه =يشكي من الدنيا عسى الله يعينه
يصرخ بصوته لاتذكًر خطاياه = يسرح مع الدنيا ويمسي بدينه
ياناس هذا الوقت ياشين مجراه = وقتن به الشيطان يصفق يمينه
اوًل ندوًر مابغينا ونلقاه = ومن العنا بعض العرب تاركينه
نترك ديار العز والخط ننخاه = كلن على ربعه يغني حنينه
وكلن جوازه داخلن وسط مخباه = والواسطه بين الجمارك وبينه
واليوم اشوفه واتركه واتعداه = ملعون يالمذنب بوسط المدينه
كني اشوف البير ولاذوق من ماه =وحنا رشانا مثل دفع المكينه
ياليتني مثل اللذي يتبع الشاه = وسط الفيافي مايشوف الغبينه
يصبح ولايدري على وين مسراه= داره على ممشى غنمهم رهينه
يالله عليك الامر يالله يالله = ياللي لجت لك كل عينن حزينه
لاجا مليك الموت ياخذ ضحاياه = واغلى الحبايب قام يزعج ونينه
صار الجسد مكروه منهم وعزاه= دفنه كرامه والعرب مكرمينه
حتى تراب الارض فوقه توطاه =كني وطيته لاجل يسدد لي دينه
وختامها طابت ترى المر ذقناه = اخر مطاف الناس لبنن وطينه