ماكنت أصدق لين شفتة بالأعيـان = منظر يردد خاطـري فيـة ويعيـد
شفت البنية لابسـة لبـس شبّـان = وماعاد ترضيها سوارة على الايـد
من بعد ماكانـت عبايـة وفستـان = اليوم ببلوزة تضيـق علـى الجيـد
يازيد انا من لبسهم صابني جنـان = أنشل طرفي يـوم ناظـرت يازيـد
كنّي من الموقف مريض بعمى ألوان = ماعاد أميزها تجـي قـرب وبعيـد
صحيح ان اللبـس رايـق وفتّـان = لكن علـى ماقيـل يحتـاج تحديـد
قالت على فكرة ترى أعشق المـان = ولا داني تشلسي ولا شوف لة فيـد
أشجـع الانتـر ولا حـب ميـلان = وافضل البرشا على ريـال مدريـد
تكتيك إيطالي علـى فـن الاسبـان = أصرف الكورة على كيـف ماتريـد
واحب أنا الكورة برجليـن الالمـان = وأهدد المرمى علـى القـول تهديـد
قلت اللة أكبر يا تصاريف الازمـان = حتى بنان اليد صـارن مجاريـد !
بالامس كانت بالعصا تطرد الضـان = وتحدهـا بالصبـح يـم المواريـد
اليوم جالس لك على الدرب شيطان = غير الشقا أطعمـك مـر العناقيـد
قالت حضارة والحضارة لها شـان = في تالـي الايـام يابـن الاجاويـد
وانـا يزعلنـي ليـا قلـت بـدوان = ماني بدوية .!ياخي قلي وش تريد ؟
قلت الحقيقة تلهـب الكبـد نيـران = ياهل العوايـد والاصـل والتقاليـد
لا وا خسارة أنتهـى كـل ماكـان = يللي منول نحسبـك شيخـة الغيـد
أبوك لة في ساحـة العـز ميـدان = ولة مجلسة بين الرجال الصناديـد
حذرى تقولين انـة أخـوك فـلان = ياصيدتـن تمـلا فمـي البواريـد
روح تعبك وضاع يـاذرب ألايمـان = يامرهب الشجعـان ياقاطـع البيـد
عزوتك راحت بين نيبـان سرحـان = يا طيبـن ألاصـل ماعـادت تفيـد