ابتدي واذكر الله ثم اسوق القصيد = واطلب الله يهدينا سبيل الرشاد
طيب الاقوال والامثال ليٌ رصيد = من لساني يبين اللي حواه الفؤاد
لابدعت القوافي جبت علمٍ مفيد = اخذ الوافية واترك كلام الفساد
التراث القديم اطوره من جديد = المعاني قديمة والمثايل جداد
دام حالك شديد ودام شوفك حديد = اجتهد والمعالي نيلها باجتهاد
امش بالهون في الدنيا وخلك رشيد = حكم العقل يلهمك الوفا والسداد
يوم تبدي علومك ون رايك سديد = بيع واشتر ذهب لاملت سوق المزاد
من عمل خير يلقى خير والله شهيد = مازرعته حصدته في نهار الحصاد
من بغي في زمانه يستفيد ويفيد = عاشر الطيبين وفادهم واستفاد
تستوي له وتبقى له على مايريد = وش يبي بعد نيل المرتجى والمراد
قص دربه على وضح النقا مايحيد = وان غلط قالوا اهل العرف كبوة جواد
والشقي يعلم الله مايعود سعيد = فالشقاوة يلين يحط وسط المهاد
امتلا القلب حقد وكل يومٍ يزيد= وانعمى الفكر والابصار راحت سهاد
حاسد الناس عايش في العذاب الشديد= من تولاه قاده للعنا والنكاد
شارد الذهن طول الوقت ذهنه شريد = لاتهنى بنوم ولا تهنى بزاد
عن طريق الهدى والرشد رايح بعيد = ينظر البيض ثم يحط فيها سواد
اسم مجهول والاسم الاساسي فقيد = قام يقذف سمومه في الغبا والحياد
قرياطير مثلك لو تعب مايصيد = ابرق الريش دايم لاتباين يصاد
انت قصدك تكيد الناس والله يكيد = كيدكم مايعادل كيد رب العباد
لاانت عنتر ولاانت خالد بن الوليد = لانقلت السيوف ولا ركبت الجياد
انظر السبع مبسوطة لكل العبيد = فوقها سبع مرفوعة بليا عماد
من تعلى بلا سلطان يحسب بليد = طاح من فوق لاسفل مرحلة في البلاد
طف نار الحسد لاتقول هل من مزيد = ريح النفس قبل النار تصبح رماد
قال من علم الانسان علم اكيد = عن هوى النفس جاهدها شديد الجهاد
الله يجيرنا ويجيركم يالعضيد = ويهدي المسلمين لطاعته بانقياد