ياحرب جيت وجيتي كنها السيل=سيل يهد الجال و يرطن رطينه
المزن تمطر والبرَد زادني حيل=خيبت سد سدود وراحت طحينه

يامرحبا ونوه طلع باول الليـل=واللي يجي دربنا ربي يعينـه
الهرج له معنى مابين الرياجيل=وانتي بنيتي البيت مثل السفينه

كم دلتن شريت ولا طبها الهيـل=رصت مع الاخرى على رف زينه
ماثمنوهـا شاربيـن الفانجيـل=هذي ضريبة ساكنيـن المدينـه

لاوالله إلا جيتني بعد ماقيـل=ولا رصيدك عندنا خابرينـه
يابنت حنا حرب ذباحت الحيل=واللي شرانا لا بعد مشترينه

انا اشهد ان بحرب عزه وتبجيل=ولاني بشرَّاية اصـل وارثينـه
المشكله لا صار بالعلم تظليـل=بالوجه ضحكه والدواخل غبينه

كل الصفات الطيبـه والتماثيـل=يالله عسى رب(ن) تراعيك عينه
بعض العرب يابنت ماهي مقابيل=مثل القفل مركوز وسط الخزينه

بعطيك انا من صافي الشعر تحليل=تحليل وافي من قريـن لقرينـه
بعض القفول تكسرًّ بهجعة الليـل=ويفك بـاب وتستحـل المدينـه

بعطيك انا من شعري جمله وتفصيل=تفصيل يمكن ياصفك بالحسينه
ليت القفول اقصار يوم الحلاحيل=دربه شمال ودربكم راح وينه