يابنت انا طيب وطيبي طبيعه = ويابنت انا حساس ولي قلب حساس
ويابنت انا متبوع ماني تبيعه = ويابنت انا انسان مايغدر الناس
ويابنت انا لي مركزً فالطليعه = لايق عليّ كنّه مفصل بمقياس
ويابنت لو ضاقت علّي الوسيعه = مشكاي للي يفرج الضيق والباس
ويابنت منهو مايبينا نبيعه = حتى ولو جوهرذهب سيغ بالماس
اتحمل اجروحي ولو هي وجيعه = طبيعةً فيني ولي عرّق دساس
الطيب سنّه والشهامه شريعه = لني بدويً شارب العز بالكاس
والوقت لو ماطاعني مانطيعه = مدري جنان ولا طناخه من الراس
بالمختصر اخلاقي ماهي وضيعه = ولاني من اللي تحت القدام ينداس
فيني حروبً مثل حرب الوديعه = وفيني طفل يبكي وتايه ومنحاس