الـــحـــجــــيــــري =
سـلام رده وافيـه مـا بهـا ميـل=تنصى الرجال اللي تِفَسْرَ المعانـي
رديتٍ مـا تنقطـع كنّهـا السيـل=واللي يفكـرّ يقطـع السيـل فانـي
الــــبـــــدرانـــــي =
وابك البقاء حييت حييـت ياشعيـل=وصلت والمعنـى بسحـر البيانـي
الجابـه اللـي قلتهـا دون تحليـل=ياكبرهـا ياعبـرهـا بالمكـانـي
الـــحـــجــــيــــري =
دام البقا والليل يـا سـاري الليـل=والله يعينك في صـروف الزمانـي
يا جدينا ياللي نظركم على سهيـل=جاباتنـا بالفعـل قبـل اللسـانـي
الــــبـــــدرانـــــي =
حـق النظـر حقـه بليـا درابيـل=واقرا على الشيطان سبـع المثانـي
والجدي ثابـت واليالـي محابيـل=وانته بعينك شف سهيـل اليمانـي
الـــحـــجــــيــــري =
أنا أشهد إنّك جدي ما فالجدي حيـل=وابليس له رجم الحصا لو نصانـي
با آسال عن صاحب لنا كان حلحيل=واليوم من عشـره رجـع للثمانـي
الــــبـــــدرانـــــي =
الساقطة من ساقط الفعـل والقيـل=والطيبه مـن حـظ ذرب اليمانـي
وصاحبك هو صاحبك يالنجم ابو ذيل=ارقب على العالي وكـب الطمانـي
الـــحـــجــــيــــري =
الذرب يشرب من قـراح الفناجيـل=ما يترك الدسمه فوسـط الصوانـي
والا وسيع الصدر لو يبخس الكيـل=كلن علـى ساسـه يقيـم المبانـي
الــــبـــــدرانـــــي =
هذا الصحيح وقـرّ يانافـل الجيـل=ولله شكـري والثنـاء وامتنـانـي
العرف يبقـى للرجـال المشاكيـل=وانته حفيد اللي علومـه ضمانـي
الـــحـــجــــيــــري =
اللي يعَرْف الصحّ مـا عنّـه يميـل=علماً بلا تطبيق مـا منـه جانـي
أنا حفيد أهل الوغى لأسرج الخيـل=وانته محمد مـا خطتـك العيانـي
الــــبـــــدرانـــــي =
مرات اشوفك نجم ومـراتٍ حليـل=يالربع شوفـوا صيفـة البهلوانـي
ماقول ياطيبـه ولا أظنـه اخبيـل=ومادح ال نفسه قيل ماهـو تكانـي
الـــحـــجــــيــــري =
شهادتـي مـن طيبيـن المداهيـل=ومذمتي من غيرهـم عـزّ شانـي
والدله اللي جوفهـا كايـف الهيـل=اقعد بهـا راسـاً يشـوق الغوانـي
الــــبـــــدرانـــــي =
مما تقوله واكثـر المـدح تضليـل=ويازينها لاجات من شخـص ثانـي
وقلبك دليلك لـو تزيـد التباجيـل=ماتبلـغ بطولـك اجبـالا لابـانـي