اشهد انه زاد في راسي عماسي=ابتلشنا بالثقيله والخفيفه
صار بالموضوع شكه والتباسي=السبايب كلها حاجه طفيفه
كان وسط الارض مخزون احتباسي=هزه الزلزال والهزه عنيفه
والتلوث عم في وقتٍ قياسي=والتكاتف زين والنيه نضيفه
مايقوم البيت من دون المراسي=ترتكي له في شتاه وفي خريفه
في قيادة من على الصعبات داسي=دون ربعه ماتناجا مع حليفه
لانخيته مايجي عينه نعاسي=من عرف مسك النصاب اعتز سيفه
والسياسه مالها غير السياسي=يشرح الاوضاع في وسط الصحيفه
والسبايب باغتيال الدبلوماسي=دون داره موتته موته شريفه
والاوامر داخل القصر الرياسي=بين التاريخ تكذيبه وزيفه
والتقدم والتوخر بالكراسي=يعتبر تنظيم من دور المضيفه
الرجاله ماتقدم باللباسي=نعرف الرجال من سابق ارشيفه
وان تعلى صوت لحاس التباسي=همه انه ماتفوته كل ضيفه
لو يزيد الهرج مايهتز راسي=عن كلامه شمت واعيوني كفيفه
ابك انا من روس ربعي وانت ناسي=الحرار اللي على عيطاً منيفه
يذبح المخلاب ماناكل طفاسي=لويموت الحر ما يعتاش جيفه
دون ربعي موقفي موقف حماسي=بالفعول وبالطواريق العفيفه
بالقصيد افهم الفصل الدراسي=واتعدى رايد الفصل وعريفه
واشرح الموضوع والدرس الاساسي=واسرد الافكار في قصه طريفه
يفهمون الناس قصدي واقتباسي=ومن بغى ينضم في فصلي نضيفه
من يهاب الرش ويجيه التماسي=السحايب سيلت وادي حنيفه
نايف بن مياس الفريدي