وجه الشبه مابين قلبي وبينك=شوقه وشوقك للغيوم ومطرها
يحن مثلك لا تزايد حنينك=ويناظر الغيمه ويرجي قطرّها
انتي صحاري والسحايب تزينك=لا رذرذت بالغيث والله امرها
تروي ضما كبدك ويزداد زينك=وليا ارتوت كبدك تلاشا دهرها
يخّضرّ عشبك في ثنايا جبينك=ويسر منظر وجنتك من نظرها
رجع الوسم منيه وقره لعينك=ياكيف الوم القلب يوم انتظرها
يذبل خضارك لوتجافت سنينك=وقلبي بعد واحه ويذبل زهرها