سلام الله على اللي له مكان وقدر لو ينسام=جبال ن من ذهب ما توفي لو عشر ن في مقداره
على صقرن عريب الساس نسل امحمد ابن كرام=سعد .. سِعد الخوي والجار شيخ ن موضيه ناره
أنا ببعثلك المرسول فيه الخط روس أقلام=أبا الحكمة سوات الصبح ومثلك يطرح الشاره
بعد هِد الجبل كيف العرب ترقا مع الأيام=يجيها السيل من غادي يشيل الجار مع جاره
تعاف الناس واقعها وتتحكم بها الأقزام=وقايع حلوها الحنظل عليل الوقت بامراره
أنا ما همنيِ أشخاص أنا همي حما الإسلام =أشوف أخوان تتقاتل وكل ن يبرز إشعاره
بعد كنا جسد واحد تحولنا قطع وأقسام=ونادينا الطبيب اللي بمكره يحقن أشراره
تناسينا ونِسينا فعوله قبل عشر أعوام=طبيب الموت أنا اسميه وشره للذي اختاره
يقولون الجمل لا طاح كثروا فوقه الأخصام=وكل ن يقطع لنفسه بسكينه في معباره
ألا من حال صرنا فيه محكومين لا حكام =بعد كنا علو الظلع صرنا فأسفل أجحاره
ألا كيف البصيره والعزيمة وأبري الأسقام =كتابي جاك وأنت الطب عندك وأنت بيطاره

هلا يامرحبا عداد من صلى وحج وصام = بخط الشاعر اللي من زمانه ثاير غباره
من حدود اليمن يشكي على واحد بحد الشام = تقول الدار مخلي من بلد مكه اليا أستاره
يافواز المشاكل من بحر جده الى الدمام = عجز في حلها قبلي وقبلك عمدة الحاره
رسمها الغرب يوم الناس عنها بالحجير أنيام = قبل مية سنه واليوم يقطف ناتج ابذاره
بدات من تونس الخضراء ومرت ديرة الاهرام = سحابه وبلها ماينفع البستان وازهاره
عساها ياعساها ماتمر الدار يالمقدام = عشان يموت راع الشر يافواز بشراره
بعد هد الجبل يمكن تحقق باقي الاحلام = لزمره شيخهم لشر قام يدق مزماره
ترى الحل للجهاد وطيت الاقزام بالاقدام = خلافه لاتدور حل والايام دواره
وانا عندي سؤال ان كان عندك يالزميل اللمام = عن اللي يقتل المسلم ويبكي عند قباره
بعد طاح القناع وبان جيب الثوب والاكمام= وقع في جرم واضح والعرب تدري عن اسراره
طلع في علم مايدخل عقول الناس ياظرغام = له تصفق خبولٍ من زمان العام منهاره
فطين الناس عنده حط له خطين واستفهام= وغشيم الناس خله في عمى قلبه مع ابصاره