يامل قلب يرجفه طاري أشواق=رجف الزلازل والرعد والبراكين
من روعت قلبي بتوديع وفراق=واقفت وانا دمعي سكايب من العين
ليت الهوى عقد يوقع وميثاق=حتى مايلعب في حقوق الضعيفين
ياكم هواوي عرض الروح الازهاق= لعيون راعات العيون المزايين
احد حصيله بالهوى جرح دفاق=ايبس جميع الاورده والشرايين
واحد حصيله بالهوى حبر واوراق=خط الرسايل متصل بين الاثنين
وانا حصيلي بالغرام التصلفاق=بين الفجوج الواسعه والضلاعين
فيها من المغرب ليا وقت الاشراق=مع ذكرياتي يوم انا صاحب الزين
وبيوت شعر مغترفها من اعماق=اشهق لي ببيتين وازفر ببيتين
مالي مثل لا احتلت القلب الاشواق =الا كما بالسجن حال المساجين
البعد موج طامي يغرق اغراق= والحب في جال البحر بيت من طين
ياليت ربي مارماني على اشواق=من سببت هل العباير من العين
ماقدرت عهد جمعنا وميثاق =مزيونةٍ تاكل حقوق الضعيفين