لو الله ألا حـــرق الــــحب فيه=والبال من كثر الهواجيس منحاس
والقلب كأنه وسط نــــارٍ وريه =وألا كما بنٍ يقلب فـــــي محماس
لا وعـــذابك يالـــــعيون الشقية=لا وعذاب العين من قل الاوناس
أزريت فــــي خفارات ٍ وانقرية=وأزريت بالفاروع وأزريت بالفأس
ما عاد لي مجلاس وسط السرية=بسلم البندق ومــــــجموع الالباس
نــــبي نتمشى يـــــم دار عذيه =ونشوف نبتن بالوطن قبل الايباس
ممشى مـــع الغالي لونه شويه=أخير مــــن جيزان وديار الإفلاس
تكفى يابن عــــواد تلحق عليه=الحق عليه قـــــبل غوال الأنفاس
نبي نـــدور طــــــفلة ٍعسوجية=ريحه نسمها ريــح مسك ونوراس
أبو ثماني يـــوم تضحك شفيه=كأنه برد مــــزن ٍ ظواهر وغطاس
والــنهد يشدا بيضه الراعبية=مــن ماكر القرناس يأتيك قرناس
وجدايلة فـــوق الردايف ضفيه=تكسي ردوفه عن ضفيات الالباس
عطهم وأنا خابرك جزل العطيه=وان وافقوا فزنا وفزت أنت بالكأس
لــــو أعرفك بالحال تبخل عليه=ما اشرح لك إحساسي وأنا أعرفك حساس

يقــــول ابن عـــــواد جاته هديه =هديةٍ مـثل الذهـب زين الأجناس
مـــــهداه مـــــن دار ٍعلينا شويه=مـــــــن دونها الطيار تحداه الأقواس
صعبه على الرجلي وراع المطيه=كــــم واحـــــدٍ من دونها صابه نعاس
يلي بـــــطرق الحب تشكي عليه=أنا مـــنه قلبي دخــــل فــيه وســــواس
إن جيت بصبر باحت المعقليه=وان جيت بافعال سرت عرضه للأدناس
اشكه على الي يحتمون الرعيه=ربع ٍعـــــلى درب النقى تشرب الكأس
أهل الوفا وأهل الوجيه الرضيه=أهل الدلال ألي عــــلى الــــنار جلاس
يـــا ربيع أبوصيك مني وصيه=وصية ٍتقطع كــــما يـــقطع الــــــماس
أوصيك عن مشي العلوم الرديه =ترى الـــــعلوم الـــــخايبة تهدم الساس
رجل ٍبغير قياس يكثر غــــويه=وان ضاعت أفكاره عليه الــــقدم داس
وأوصيك بالطيب وخلك خويه=ترى الــردي فـي بعض الأحوال ينحاس

صح لسانك شاعرنا القدير
وصح لسان شاعر الخليج صياف رحمة الله علية
ودي وتقديري