انا السجين اللي بالاعدام محكوم = حكمي قصاص وراضي بحكم الاسلام
يفز قلبي كل ماقيل مرحوم =فزت سجين زاهمينه بالاعدام
سبع سنوات وكنها حلم جاثوم =بين اربعة جدران عايش بالاوهام
راحت حياتي بين شاتم ومشتوم =النفس عقب العز هانت لشتام
الحر لاذاق المهانه جفى الحوم =لورفت الجنحان بالجو ماحام
غديت من بين المساجين مظيوم =والدمع من عيني تقل دم حجام
بقبرالاحياء ياعرب صرت مخدوم =عيني عجزت عن لذت النوم مانام
دون الفضاءباب على القفل مختوم = ولامن وراه الا العساكر لها اضرام
حكم القدر لاشك باللوح مرسوم =مرسوم فيه الكاف والنون باتمام
شكيت من جور الليالي على البوم = للواحد المعبود علام الاعلام
اخطيت في حقى ولانى بمعصوم =تهت الطريق وصرت انا اليوم منظام
هاذي وصية نادم عاش بهموم =بين الذنوب وتاب عن كل الاجرام
ينصحك ياللي تايهن دايم الدوم =تسرح وتمرح بالمعاصي والاثام
اد الفروض الخمس والحق بها الصوم =واحذر تماشي كل مسرف ونمام
يالادمي ونعشت في حزت اليوم = اقلع عن ذنوبك ترى العمر قدام
ياللي عصيت الله ترى العمر معدوم = العمر تغنيه الليالي والايام
يالادمي قدامك القبر مكتوم = ولو طالت ايامك ترى العمر مادام
باكر تموت ويصيح القبر مهدوم = وسط اللحد ملفوف في قطعة الخام
اعمل لذاك اليوم لاصرت مغموم =يدخلك ربك جنة كلها انعام
من طاع ربه يافتى صار محشوم = يجزيه ربه بالمكارم والاكرام
ومن ضيع الطاعات بالحيل مهزوم = ضحك عليه ابليس في طيف الاحلام
يالادمي بنصحك وان صرت شغموم = اد الزكاة وحج وطاف بحرام
ارض الولى تسعد وتفلح مع القوم = واتبع رضاالله وولدينك والارحام
اعمل اليوم وفيه خاصم ومخصوم=وخلك كفيل للا رامل والايتام
اعمل من الطاعات والامر محسوم = وحذرك من موضات عباد الاصنام
تم الكلام على الخير مختوم =من توقيع شاعر على راس الابهام