يالله لاتجعل على الارض ظلاّم=يلي إليك المشتكى والطلايب
مافيه غيرك بالمخاليق علام=تعلم خفيات العدى والصحايب
ترازم همومي لها عدة اعوام=تجلب على قلبي صنوف العقايب
لو انها ودت ولا جابت آلام=ماكان حطتني بوسط النشايب
بس البلا مركوزتن مثل الاعلام=وإلا مثل ركز القبر والنصايب
لا واعذابي من صواديف الايام=الي تفرق بين شمل الحبايب
كم واحدن من واهج الحب منظام=يذراه حزنه مثل ذري الهبايب
وكم واحدن عقب المحبه والأحلام=يمسي وهو مدفون تحت الترايب
تبكي عليه الفاتنه مثل الأيتام=والدمع حره مثل حر اللهايب
ولا ياوجودي وجد مكسور الاقدام=خلوه ربعه دون ذنب وسبايب
خلوه وجهتهم من الشرق للشام=واقفو وعينه للزمل والركايب
يوم انتخى ماحوله ربوع واقوام=راحت محاسن نيته للقرايب
هذا وجودي لا طرالي من العام=عذب الوصوف الي به القلب ذايب
حكمه عليّه بالهوى حكم صدام=يأخذ على المجني عليه الضرايب
أقول له قلبي عن الحب صوام=ويقول لي قلبك من الحب شايب
وأقول له حبي غدى عقبك اوهام=ويقول لي ماذقت مر الغلايب
ليته معي ماصار مخطي ولوام=ولا تركني بين جرد المصايب
اشكي عذاب العشق والعشق مادام=لكن لي الله يازمان العجايب