لا ضاق بالي شعلت النار=وأدنيت مايذهب عماسي
دلال صفرن زهت ببهار=والبن يحمس بمحماسي
في مجلس مكسي ووجار=مايدخله كل بلاسي
يا الله وأسألك حقوق أمطار=يروي عطش حدب الاطعاسي
ويهيج عشبه وتنبت أزهار=ريح النفل ينعش أنفاسي

لاضاق بالي ذكرت أخيار=اللي على العين والراسي
أهل الحميا رأس الكار=كسابت الطيب نوماسي
أفرح لاشفتهم بالدار=كنزن من غالي الماسي
اللي عندي لهم مقدار=مقدر بقلبنا راسي
لا أظلم علي وقت أقدار=لي صحبتن نور الادماسي

ماجور يا اللي نظمت أشعار= ماجور ياطيب الساسي
لا يضيق بالك مهما صار=أبعد عن القلب وسواسي
أن كان جوك عليه غبار=الوقت في حقكم قاسي
عليك بالواحد الجبار=اللي تلجأ له الناسي
أدعوه دعوة واحد بار=في حس وشعور وأحساسي