سلام يا كاسب غلا كل مغليك=يامالك زمام المراجل بيمناك
الطيب ساسك والعرب عزها فيك=لا ضاعت علوم الرجاجيل تنصاك
ربعك تفاخر بك وتفخر بطاريك=لاهان ذاك اللى على الطيب رباك

يامرحبا يا اللي لفتني معانيك=يا طيب المبدأ على الطيب مبداك
سبحان من هو بالمعزه معليك=يا طيب المجنا على الطيب مجناك
أحذر رعاك الله صحبة صعاليك=إن كان ذا الوجهين والا من أعداك
أحذر صحيب ابليس بالهرج يغويك=يدور الفرصه لذولا وذولاك
لا صار له حاجة حولك حواليك=أصدق صديقن مخلصن ماتعداك
وإليا بدالك حاجتن ماشقا فيك=بأصعب ظروفن لك روح وخلاك
لاضاقت الحيلات وزاد الشرابيك=عليك باللي يحتميلك ويفداك
حنا سلاحن لا حملته على يديك=ذخر الزمان اللي عن الغير أغناك
إليا طرالك حاجتن دوم نفديك= لأجلك مشينا من على درب الاشواك
يا صاحبي أجمل تحيات نهديك=عسى الولي دايم على الخير يقداك
لك الغلا مافيه ضنن وتشكيك=لولاك مايكتب من الشعر لولاك