يانجم خلك في جوار الاهله= من نورهم تاخذ شعاع يثيبك
يجعلك من ضمن النجوم المطله= نورك يلالي والعرب تقدي بك
امجلس يلم رجال حذرا تزله= ادخل وماصاب الجماعه يصيبك
تلقى رجال (ن) هرجهم ماتمله = هذا يرحب بك وذا يعتني بك
اسمع كلام الناس كثره وقله= خذ ماصفالك واترك الي يريبك
واليا هرجت احذر تجي منك زله= هرج الغلط وسط المجالس يعيبك
والمجلس البطال حذرا تدله = يقل مقدارك ليا بان عيبك
واليا عزمت احذر تجي فيك ذله= خلك شجيع ولابتك تعتزي بك
واليا قبست ابعد عن اهل المذله= راع العلوم الطيبه هو نسيبك
واحذر يجي ممشاك مع كل شله=الي يشد الحيل خله صحيبك
قدمت ماعندي و حطيت ادله= الله عساك تشيلها من نصيبك
اخذتها من شيخ عشنا في ظله= خله مثلك تشوف عزك وطيبك
مريع الي كل عقد يحله = حكيم راي ولا سألته يجيبك