حي الجواب اللي به عطور قزاز =وأهل الوفا حرف الصفا يكتسيهم
ياصقر ياصقر المراقيب يالباز=أنته أعدك من رجال اصطفيهم
قريت خطك وأرسل اليوم إيعاز=حسب الذي مكتوب للي اتعنيهم
خلك على نهجك وطبعك له إعزاز=ولابد نهج الطيب ما يحتويهم
ترا السفينة بلجت البحر تجتاز= رغم اصطفاق الموج .. ما تزدريهم
تعبر بحور (ن) مالها شامخ(ن) راز=وتراسى على المينا بما يهتنيهم
وياصاحبي خلك كما بز بزاز=والبز يصبح حب منهو ضفيهم
سمعتلك فتوى من الشيخ بجهاز=وأهل الصلاحة سِعد من يقتديهم
وإن شفت مافيهم من الخير مخراز=ترا الصقور أوكارها تعتليهم
أبعد عن أهل البور لو رحت شيراز=أشري هوا بالك ولا تعتريهم
والفضل للخلاق والخلق تعتاز =وأهل الجفا الدنيا ترا تلتويهم
والناس فيها ألوان وأشكال وطراز=شي (ن) نوده وناس ما ننتخيهم
والظلم لقلوب المخاليق جزاز=والظالمين امصيرهم يكتويهم