جود الزمان وشح منتوج الافكار = ساعد نظام العولمه للتعري
وضعف الشيوخ اللي عليها الفلك دار= نشط دعاة العلمنه بالتجري
حرم حلال وجاز تحليل الاضرار= علمن يهول ونفعته ماتسري
والغيره اللي كنها شعلة النار = رمد حطبها من يدين المذري
حتى الهنوف اللي نبى صوتها عار = يسلب حياها نور نجمٍ مسري
مات الشجيع اللي على قب الامهار = خلى الدويني في زمانه مضري
واللي عليهم يثبت الموقف الحار = راحوا ضحايا مهتوين التحري
حق الخوي والضيف والعود والجار = حطوا لها مخرج طواري وسري
كل السلوم اللي لها عندنا كار = غيب عليها وقتنا بالتزري
حتى الضرير اللي فقد شوف الابصار = معاد وده بالنظر يستقري
بيت الشرف والعز يناس منهار = خيم عليه القصف جوي وبري
حطم زوايا البيت والناس الا خيار = واللي بقى منزوع منه التمري
حب وغرام وعشقةٍ كلها اسرار = علاقةٍ فيها النسب مايمري
ماهي على شرع الله النافع الضار = فيها من علوم الدنس والتهري
وقت يخلي صاحي الفكر محتار = بين الحياه وبين موت التبري
جعل الزمان اللي قطع صوت الاحرار= يقطع حياة اهل الردى والتعري

المشاركة الأصلية كتبت بواسطة منيره الحربي (المشاركة 936047) صح السااانك ولازالو الناس على سلمهم ودينهم وعداتهم الحميده

المشاركة الأصلية كتبت بواسطة متعب العمري (المشاركة 936084) صح لسانك اخوي صنت والله يعافيك على القصيدة الرائعة بمضمونها والحمدلله لازال الخير في الدنيا والله يعز الأسلام ويحمي المسلمين ويحفظ علينا ديننا ويسترنا اجمعين................ كل الشكر