ياهيه ياللي جلبت علـوم منعاجـه = تبغاني اهرجبهـا واكون هرجهـا
ماني من اللي يردد هـرج هراجـه = تسمعبها اليمنا واليسـرا تخرجهـا
العلم نعرف لمدخاله ومخراجـه = يومنً بها ناس ماتعلم مخارجهـا
ماغشنا فلمكم واضح مـن انتاجه = نعرف من اللي كتب قصّتك وخرجها
اللي كتب قصتك قلبه كما الصاجـه = أسود وطبع القشر ناهـج مناهجهـا
رجله في درب الردى كل يوم دواجه = أمحق من ديار وأمحق هم دايجهـا
باسج عن سيرتـه وقفـل ادراجـه = من شان طاريه كبدي حيل يسمجهـا
لوكانت اهمومي كبر دبي وابراجـه = شوفتك ياللي ملكة الروح تفرجهـا
وين انت ياللي لك الأشواق وهاجـه = جوف الحنايا لهيب الشوق يسرجها
الجرح غاير ترى ماغيـرك علاجـه = في طلتك بلسم جروحـي تعالجهـا
وفي غيبتك ياوليف الـروح هداجـه = عيني عليكم كمـا تيمـا وهادجهـا
وأن كان في ودنا ماعاد لك حاجـه = ارسل لنا شفرتـنً قلبـي يبرمجهـا
وارجوك لاتجرحه وتسبـب احراجـه = اكتبها فرسالة الجـوال ومسجهـا
حتى سجين الهوى يعرف متى فراجه = اللي في زنزانتـه ماغيـر يدرجهـا
نفسه لرحمتك يا رحمـن محتاجـه =وانت ولي البشر تقضـي حوايجهـا
وصلاة ربي عـدد ماطـاف حجاجـه =وعداد مارسى على بحره بورجهـا
علـى نبيً كتـاب الله منهاجـه = واصحابه اللي على المله مناهجها

المشاركة الأصلية كتبت بواسطة رابح الجحدلي (المشاركة 863664) صح لسانك على القصيدة رائعه والله يعطيك العافيه بيض الله وجهك

المشاركة الأصلية كتبت بواسطة فواز الزويهري (المشاركة 863972) صح لسانك وبيض الله وجهك لك خالص التقدير