دخيل مدّ الساق ياالقرم مدّه=يمّ الاماره شخصك مكلفينه
مبنى علم عنه النظر ماتصدّه=في دور ستّه صاحب ٍ قاصدينه
خطّي كتبته يابن الاجواد ودّه=من يدّك اليمنى يسلّم يمينه
الصاحب اللي تزرع الخير يدّه=شخص ٍ على يمنى امير المدينه
ينبيك طرف العين ساعة تلدّه=على نباه الزين ضحكة جبينه
العلم والحكمه لراسه مخدّه=وتشوف في وجهه رضى والدينه
عذب السجايا كل ربعه تودّه=وحنّا لكربات الزمن ذاخرينه
رجل ٍ كريم معرّب الساس جدّه=واللي يعرفه مايعرف الغبينه
ابو فراس اللي ليا جات شدّه=يبقى لنا حصن ٍ جسوره متينه
هو منهل ٍ للطيب ماجف عدّه=وعسى الفرح دايم يحالف سنينه
حاش المراجل بجتهاده وجدّه=والطايله جاته بنجدة يدينه
هو مزبن اللي وقفوا الناس ضدّه=يضفي على ناصيه ثوب السكينه
عساه مايلقى بوقته مكدّه=ويطول عمره بالمعزه لدينه
قلّه ترى خالد له اسنين عدّه=لاونّ محد ٍ داري ٍ في ونينه
سجين همّه واقف الحض ندّه=وصعب ٍ على السجّان يعفي سجينه
والوقت سيفه قطّع الكبد حدّه=والصبر مابقّى جسور ٍ حصينه
واليا طلب من مثلكم مايردّه= حيثك على ضنّه توافق يقينه
والله لولا الهم ماباح سدّه=واللي يعين الناس ربّه يعينه
هذا جوابي عجّلولي بردّه=حلو الخبر من يمكم ناطرينه
وختم الحكي صلّوا على اللي نعدّه=اطهر بشر مخلوق من خير طينه