سميت بسم المعتلي عالم الغيب = ربٍ كريم ٍ ، كل حي ٍ يساله
أنا ليا مني بغيت الهناديب = قطفت من ذوق المثايل زلاله
ياسعود يابن حمود يامنقع الطيب = يا لابس ٍ ثوب الفخر والرجاله
أخذت بالدنيا دروس وتجاريب = ورجّحت ميزان الوفاء بالعداله
أنت الذي حلّيت عقد النشاشيب = يوم الرشاء ياسعود ركب المحاله
وقفت سوانينا تهز العراقيب =وصار اللوى بالأرشيات الجلاله
حلّيتها ياسعود حكمة وتأديب = وأرخصت مالك ياكريم السباله
ياطيب الرفقه حصان الأطاليب =ياطايل اليمنى بمد الجزاله
ياعز ربعه والخوي والأصاحيب = عليك من حاتم رموز ودلاله
يابن الكرام اللي تعرف المواجيب = اليا ارتخت يمنى خطاة البلاله
والله ماننسى اللي دفعته من الجيب = ونجازي المطران في كل حاله
وننشرلك البيضا، بروس المراقيب= وجه ٍ يطق الوجه ماهي رساله
ياسعود للمطران سلم وتراتيب = اللي يفكون النظاء بالبساله
مطران بالتاريخ لهم مكاتيب = بأطراف مشذوبه عبوسٍ قتاله
أهل ركابٍ ما عليها زواريب =ياما اذبحوا من دونها من خياله
وبالعاذرية مثل حذف المشاهيب = من فوهة الرشاش له اشتعاله
للماص بخشوم المواتر مضاريب = وأقفت بطرمان العساكر دباله
يا أهل الركاب مكسرات المصاليب = لمناحي القنّي عليهن كفاله
من معجزات مطير غصب ٍ بلا طيب = يوم ٍ كلن يفتخر في فعاله
موثقه مافيه شك ٍ ولا ريب = ليا حل من بين المجالس مجاله
دنيا لها في كل يوم ٍ تقاليب = قولوا لغافلها ، وعزي لحاله
معشوقة ٍ مستسلمه للخطاطيب = غدّارة ٍ مكارة ٍ بالفساله
ماهو بدايم صافيات المشاريب = ولا كل من يطلب مزاجه يناله
نوب ٍ ضيوف ونوب حنا المعازيب = ومن لا أفلحت يمناه تترب شماله
ما داومت لأهل السيوف المحاديب = ومن نوّخت له ثوّرت به ارحاله
أحدن تعلق به عميق الأصاويب = وأحدن تخليه ايتلفّت لحاله
ياسعود يامفتاح قفل اللواليب = يالجعفري ياللي تحب الجماله
محنّك ٍ فيك إلتفات ٍ من الذيب = وسبع الخلا ما يدركك بالختاله
يانادر الماكر عطيب المخاليب = طير الثلاث ولا تصيدك احبالَه
عيد الركاب المهزلات المهاذيب = ليا شح مثبور النسب في حلاله
تشرح صدور أهل النظا بالتراحيب = وفالجود بالماجود لها كماله
المرجله لها دروب ٍ وتدريب = وتصعب على اللي قاصرات ٍ حباله
ياشوق من له ميزة ٍ بالرعابيب = بنت الحصان اللي عريق السلاله
مثل جنيه الجرج مابه عذاريب = أعز سلم وقاضب ٍ رأس ماله
ماهي ببنت اللي يحب المذاهيب = يشتال مشعابه تقارش نعاله
والله ما قلته لا نفاق ولا اكاذيب = صنعتها وأبدعتها بارتجاله
حربي ولي مع حرب حبل ومقاضيب = ماني حليف مرددن بالأصاله
من روس حرب اللي تهدي الأصاعيب = اتخلّ الصعَب يبرك متين ٍ عقاله
حرب الحرايب من سمو الأجانيب = بدو ٍ لهم في نجد جوله وصاله
فتّاقة الزربه لامن الخطر هيب = بضعاينٍ ترعى الخطر وتعناله
وتبرا لها وضح ٍ عليها دباديب = ترعى خطر ماضرّيَت للجفاله
محميّة ٍ بمحكمات التراكيب = بأيمان ما بين الرضا والزعاله
وأنا أحمد اللي بدّل الشر بالطيب = صرنا إخوان بحكم رب الجلاله
وصلاة ربي عد وبل السحاحيب = على الذي كمّل بنود الرساله