الشعر ياهل الشعر تعبير وجدان=ترجم أحاسيس النفوس وخفاها
ويدوّن اللحظات في عمر الانسان=مهما تقادم وقتها مامحاها
والليله الفرحه رساله وعنوان=ينقل خبرها كل قاري قراها
ليلة فرح من طيبكم حظها زان=وغطى فرحها أرضها مع سماها
تلبست من زاهي الطيب بالوان=نادت وواجبنا نلبي نداها
ماثمنت فيها القوافي والاوزان=وعصم القصايد ماتصل مستواها
يامرحبا فيها عددهمل الامزان=واعداد ماهبت نسايم هواها
بضيوفنا اللي فالضماير لهم شان=ولهم معزّه يعلم الله مداها
بقدومكم عم الفرح كل عسفان=وصار الفرح ملبوسها اللي زهاها
جيتو وشرفتوا على شان سلطان=ويستاهل القمه عزومٍ رقاها
الفارس اللي حاز فالمجد نيشان=حتى تعلّى قمته وامتطاها
حرٍ منقّى نسل حرٍ وشيهان=تلقاه دايم في طلايع لواها
ولاهي غريبه لو تقدّم كحيلان=والمرجله ماتعصي اللي نواها
ولاحازها راقد وسالي وكسلان=من دون راحتها مصاعب عناها
باسمي أبارك له وعن كل الاخوان=تعبير عن طيب النفوس وغلاها
ولاجل البلد حنّا جنودٍ وفرسان=نحفظ مكانتها ونحمي حماها
وأنا اشهد إن المملكه خير الاوطان=وان سلتني مافيه أرضٍ كماها
دار المعزه والمحبه والايمان=الخيمه اللي كلنا في ذراها
الله يرحم من بدل خوفها آمان=وبالعدل وحّد يابستها وماها
عبد العزيز اللي على مر الازمان=يذكر مع الأبطال في مبتداها
واليوم قايدها مليكٍ وإنسان=قايد مسيرتها وكايد عداها
ويحيا ولي العهد سلطان سلطان=صنديد حامي برّها مع فضاها
تمّت وصلوا كلكم قلب ولسان=على الرسول اللي بهديه هداها