سميت باسم مكون الكون سبحان =محيي العظام ونافخ بالجسد روح
هو واهب الهيبه نبيه سليمان =وحكم النجاره واهبه للنبي نوح
باسماه للمومن حمايه عن الجان =وتوبة خطا عبده لها الباب مفتوح
واباجتهد واصيب واخطي وانا انسان=وخطا ماهو مقصود بالعذر مدموح
وكان القبيلة قلب والشاعر لسان=مشاعر الشعار بامجادها شحوح
كم شاعر فكره بالابداع مليان =وحلقه على تجريح الأمجاد مبحوح
مادام مالفوا على الجسم الأكفان=والله لااشيد بمجد الاجداد وابوح
مارضى يقال غريس ولا ابن برمان=وانا اعتزي عزوة سوالم ومسروح
عزوة لها في قمة المجد عنوان=حربي وترهب عزوتي كل طحطوح
بفعل مضى له قبل الامان برهان=وقول بلا برهان ضحضاح ويزوح
ندون البرهان في كل ديوان=بفعل يزويح جروح ويغمق جروح
بشلفا ورمح وخطام وسنان وعنان=وقول وفعل ماهي سواليف ومزوح
سقنا العدا سوق المثيرة لربان=والحي مارد النقا بثار مذبوح
تاريخنا حافل بسيات واحسان=منا ولنا مجد ينابيعه تفوح
تأذن به الشيبان بسموع شبان=ولا مات من فعله بذكراه ممدوح
لنا ثلاثة ملك مامثلهن كان=نفدا الخوي والجار بالمال والروح
وناسم عصا العاني علشان مايهان=وبسلمنا دم النقا فيه مسفوح
وشهودهن بالصك شمر ومطران =حتى نقول العلم مقفي ومنطوح
وفي قارة الأسلاف شيد لسلفان=بيت ذرى وظلال عن كل لافوح
ابن نحيت ليا اعتزوا فيه صدقان=خلا المشوك في دجى الليل له ضوح
يبشر بعز من اعتزى باسم مزنان=نسوان عدوانه زغاريدها النوح
احفاد من للمصطفى اصحاب واعوان=ولهم مع الهادي غزوات وفتوح
ويوم ان نجد لقرح الخيل ميدان=كم حد ممنوع لنا صار مسموح
بشريدة الفرسان والسيف فسقان=كم عين طماع كحلها بذرنوح
لا اومى بدس الطير راحوا شبختان=له عزوة يرهب بها كل مشفوح
ومحمد ابا الروس كم راس طمعان=بحد اللويصق عن تراقيه ممسوح
فعل يسمى به هاكاليوم للآن=اسمه مع هل المجد ماهوب مسنوح
ومجوز العزبان زيزوم الأضعان=لولا الفعل ماجاله الاسم مملوح
من رافق سعيد رجع معه كسبان=ماقالوا الذكري رجع مثل مايروح
ووثايق التاريخ باسم المضيان=لولا ولد موسى تعرض لساموح
ولولا الحقايق ثابته لاهل الشان=رجع بها فايز على حرب مكسوح
ماهو تنبي للحدث مثل كران=جاب الخبر من يوصله عزم وسفوح
بدلايل مادلها كل شرهان=قص الأثر للذاهبه مبعد الشوح
واقتادها قود المطايا بالأرسان =ويالمبصر اقرا ويالعمى تابعه واوح
مدونه للي للأمجاد ضرمان=بعذب الشراب وزاد ميدم ومملوح
وياللي تقول بما احتوى ماني قنعان=افزع ولا اقول الخطر عنك مطروح
أما يجي مفزاع قابوس لعمان=ولا مثل فاروق والموج واللوح
للطايره كبتن وللسفن قبطان=ولا جاب جوهرة البحر كل سابوح
ورعية معها جنبها ورعيان=وشهودها بأفعالها شمخ تلوح
والهاملة مخلصت دين ديان=ولايقتعد راس على الزيف مسدوح
وبيت بلا بيبان لو فيه سكان=الباب عن صلف الهوا فيه مصلوح
قلته وانا بتقصير تعبيري مدان=مير القريحة وقعت في صفا صوح
والشعر له نقاد تعبير واوزان=وماقل دل وزبدة العلم منضوح
وليا اعتبرتوا غلطتي كبوة حصان=من عرضكم يااهل الوفا الصدر مشروح