يالله ياواحد لك الناس ركاع= انا دخيلك عن اعيال السفاحي
عبدك وابن عبدك من العوج جزاع= ومن حقي المشروع دسة سلاحي
وانا اجودي ماني بالادنين قطاع= ودايم محلي بالبياح البراحي
واشوف وقت من شواريه مرتاع =وابا السكوت وعنبر الصدر فاحي
اودعت مالي عند سبلا تجي باع= والله ماحسب ان المحرم يباحي
وتقاسمو مالي على مكر وخداع =على كلام الناس قسمة سحاحي
قلت اسمعو راعيه مااهدا ولا باع =امانة الناحي عريض اللواحي
وعندي خبر بحلوقكم وسع الارياع= ولا ادري لو الباري كتبلي نجاحي
وقالو لي انته عود ارفل وطماع= راح الزمان اللي هجاد وصباحي
قلت اشهد ان الصدق هو والحيا ضاع = يانذل مالي مايفكه ملاحي
وجيت الوكيل وقلت ياضبع فضاع= والله مافعلك معي فعل صاحي
وقالو لي الحضار لو مالك ا وزاع= بعها على الباري وماراح راحي
مدري قدا والا مع الضد ضلاع= والا عليهم من جهنم جناحي
قلت اسمعو ماني مع البطش مطواع= وصحنا عليهم واستخفو صياحي
وجونا من الما من هدد عقب مرباع= كبر الجبال وجوهر العقل ماحي
امحاهم الله مايعرفون الاسناع= جند غبر كله بطون اوفطاحي
ياطارش مني على فج الاكواع= هجن عليهن وسم الادنين لاحي
ودوا نبا مني على كل الانواع= مقدار واعتاب لوسيع المناحي
الاشقر اللي بابرق الريش فداع= وذخري اليا قلت علي المشاحي
وخلافها علم على كل الاسماع=يابو سند مابالمواقف سماحي
وانته يابو سلمان ماجيت فزاع= يوم الحناشل ناصفوني مراحي
ودي لو انك جيت باسلوب فراع= وان ماصلح ضدي وجودك صلاحي
لو جيت نور نوركم مضلم القاع= وتكسب جميل وراحتي وانشراحي
وصلاة ربي عد ماهب ذعذاع= كفت ايدي اومن لساني كفاحي
وعبر ترى مانته على الديد رضاع= وهبي برده ياهبوب الرياحي