العفش شد و لا بقى له توالي=على الجيوب مفشخات البوالين
صفط و حمل كل طيّب و غالي=يبغى الصباخي و السهل و الضلاعين
كلآ طراله عشق وانا طرالي=عشق الاحرار و طيبات الشياهين
جيت العزب ولا ان فيها الرجالي=و قرشع حمام و قرشعين السمامين
و دكة و مجلس و في النصيفة دلالي=و التمر و الابريق جنبه فناجين
و الطير فوق الوكر حطة شمالي=و اللي يزيّن في الشبك جالس يمين
ربعٍ تحيي ضيفها ولا تبالي=لذبحة خروف الضيف من قبل ضارين
الفجر لا صفي الندى و الخيالي=و شيف السويبع قالوا القنص هالحين
القنص حل و حل وقت المجالي=وهوّاية المقناص يأتون عجلين
تلقى الجيوب الصبح وسط الرمالي=و راع الونيت يدوّر الصافح يمين
و ان كان شافوا طير يم الطوالي=تزاهموا و اقفوا سواة البراكين
تجمعوا عنده عيال الحلالي=دايم على شبك القرانيس ولهين
هذا ولع ما هو طلب رأس مالي=عند الفقير و عند ناسٍ ثريين
لا حل وقت القنص شد الرحالي=و خلى العمل و البيت وام الوراعين
و شهرين كمل بالوفا و الكمالي=في شرحة الخاطر عسى الخالق يعين
أما طرح ولا على الطيب فالي=أنكف و عاد سنين من بعدها سنين
لا بد ما يخلط مراره بحالي=لو التعرف بالرجال الوفيين
من عارف اهل الطيب نال المعالي=في العرف و المعروف و الصدق و الدين
وهذا هو المقصود من أول و تالي=قولٍ وكاد و لا يبي له براهين
و صلاة ربي من يمين و شمالي=أعداد من حجوا و وقفوا ملبين
على نبي أنهى جميع الشكالي=محمد رسول الله إمام المصلين