دوك السوتش ودق سلف اشهب اللون = وخله يسخن يا عريب المجاني
ولا راح شكمانه تقل راس غليون = ثم صار للماء بالقزوز اغلياني
درج من الشارع وهاته على الهون = ثم شد عفشه ياذريف اليماني
واركب يمين وخل لي الدرقسون = انا الدليله وانت جر الغواني
من فوق شاص لصطفق تقل مجنون = او وجه ذيب شايف مودماني
مافوقه إلا دلتين وغريون = وبيج الشراع اللي يحفظ الاواني
امصدر للشرق الاوسط ومصيون = عليه بالكتلوج صك وضماني
من دار قوم معتزين بصهيون = جباني الصانع وقلبه جباني
مرالخليخ وركبوا فيه فريون = لجل الجزيره جوها شقلباني
وجمرك ودخل نجد مافيه ممنون = مدفوع شيكه في حدود العماني
عليه اباغني طواريق ولحون = وانظم من المعنى بيوتن اثماني
انا لقلت القيل وافي ومازون = مليان بيته من بديع المعاني
ان عشت اغني مثل ناسن يغنون = وان مت غنى به فصيح اللساني
والكار للي بالمعاني يمدون = من فعلهم ننظم جزيل البياني
ناخذ من المعنى والاجواد يعطون = ماللحكى لولا الفعايل كياني
ياحرب ياللي بالمواقيف تثنون = تلزون لا شانت ظروف الزماني
بامجادكم كل المخاليق يدرون = من طلعت البيضا الياقصى مكاني
واجب عليكم بالطهيمي تعزوون = ترى القبيله عزها بالعواني
المال ماحطه لجل يصل بليون = حطه لجل يملى وساع الصياني
والبيت شاده دون ضبه وكالون = امشرعن بابه لمن جاه عاني
جمع يتغداى به وجمع يتعشون = بيتين مليا والخيام الثماني
والبل شراها ماحسب كم يحدون = مهو بلجل الفلان . لجل الفلاني
يزيد سومه كل ماهم يزيدون = حتى ان راعيها ينادي كفاني
العام راعيها فقير ومديون = واليوم في باريس يبني مباني
وشارك بهن ياحرب منشان ترضون = شارك بزينات الخدود السماني
جردن وبرها منكسن تقل محسون = هنف الخشوم منكسات الاذاني
هزع المواخر متعبة من يسومون = وارقابها تشدى مقام السواني
مافيهن اللي سعرهادون مليون = ألا فحلها زاد مليون ثاني
ماتقل بالميدان جاء ذود مزيون = من زينهن زين المزايين فاني
جابن الاول حققن ماتمنون = انا احمد اللي جابها يالعواني
لازم معي ياحرب بالله تقولون = عاش الطهيمي مابقى ضلع اباني