خط القلم قافي على طرق مسحوب=يحمل تحيه صادقه من ضميري
مثل العسل لامن جنيناه من نوب=تاصلك مني وافيه يانصيري
يالشاعر اللي من رجاجيل محسوب=من لابة ٍ تفزع تفك الاسيري
القلب مني يابن الاجواد مسلوب=مع واحد ٍ ليته قبلني عشيري
طلبت قربه مير ماهو بمكتوب=وانا بعد فرقاه حالي خطيري
حلو ٍ مترّف داعج عيون رعبوب=ضاري على لبس الذهب والحريري
مايعرف البيدا ولا تاه بدروب=يموت لو بالقيض رجله تسيري
مايعرف البراد شاهيه بالكوب= ماياكل الا بيض مقلي وكيري
لبسه تنوع كل ساعه وله ثوب=ليت القدر يجبره يسكن قصيري
في حاجته مخدوم ماهو بمتعوب=ولا واجهه بالوقت ضرف ٍ عسيري
ماهو بمثلي من عنا الوقت مغلوب=واتابع الونات وازفر زفيري
والله ياعيسى عن الزين ماتوب=ياليت منهو في حياته خشيري
وانته صقر شيهان مافيه عذروب=لولا الجناح وهقوته مايطيري
ولجلي اعدك شخص غالي ومحبوب=ارضى بما تحكم علي وتشيري

يامرحبا اعداد ماخط مكتوب=ترحيبة الصاحب صدوق الضميري
باللي للشعره نغم واشجان واعذوب=صيغة روائع مثل نسج الحريري
يشكي هواء ترف من البيض رعبوب=والحب تأثيره أليم خطيري
ياما وياما منه تايه ومسلوب=العقل واصبح للموده ضريري
حالي مثل حالك يالولا الحيا نوب=من البشر لابيح سري لغيري
في حبهن ياستاذ غلبان مغلوب=لوبكشف الاسرار حست المريري
اخفي بلاي بداخلي وابني الطوب=على المخازن سدها لايطيري
اكذب على عقلي ولوقلت ابا توب=اقراء اعترافاتي وعطها مديري
الحب مهما قيل مكروه مرغوب=وقعت فيه وعاد هذ مصيري
تبشريابن عمي ومطلبك ماجوب=علي لك فزعة رفيق وقصيري
مالي وجاهي فدوتك كل محسوب=وقفة محقٍ ماسمع للشويري