لد النظر ياللي تكلم علي لد = وارفع بصوتك كان عندك صمايل
مايرتفع ضغطي ولا صير منشد = خابرك قول ولاش عندك فعايل
لكن تريح واسمع العلم والرد = مثايلٍ مامثلها بالمثايل
وش انت لاقي يومك تروح وترد = مقهور ولا وسط جوفك غلايل
مكسور عين و واسمينك على الخد = وعندي على ماقول ثبت ودلايل
كبرت حجمك وانت ماتنطح الضد = وصنفت نفسك من عيال الحمايل
يمناك ترخيها ولاتمدها مد =هذا دليل انك من اهل الخمايل
نقدر نجيب علومك ونقدر نعد = واشبها من فوق راسك فتايل
ياكم شنب وضعت له منزل وحد = وردعته بشتى الطرق والوسايل
وانته على ماقيل لاخالٍ وجد = جرف ليا من نيش قام يتهايل
لو انها بالسيف ومصارع اليد = خليتك تشوف العنا والهوايل
الكلمه اللي قلتها كذبٍ و عمد = جابت على راسك بروقٍ تخايل
حنا الرجال اللي لنا الصيت والمجد = وحنا هل الطالات واهل الجمايل
تحمل الكلمه وخلك لها قد = لاتنحشر بين النساء والعوايل