لعنبو سوق شفته بالمطار القديم=جعل من يدخلونه كلهم بالعما
فيه ما تعزل الرجال بين الحريم=حطو الما مع الما واختلط ما بما
الوسيمة تناظر عينها فالوسيم=والوسيم يتمغنج مثل عذب اللما
ناثر الشعر الاسود مثل ليلن بهيم=فوق متنه وحول خدوده النعما
اسم رجال مير الشكل ماهو حشيم=وكل فعله خبيث وشين ومحرما
وشافت العين وسط السوق شين عظيم=وما توارا عن الاعيان شي اعظما
كن مافيه رب اسمه السميع العليم=ولا عيونه ترا من فوق سابع سما
وجد روحي لو اني بالصحاري مقيم=ولا عيوني ترا الاجرام والمجرما
مير بدعي عدد ماهب ريح النسيم=وعد من زار بيت الله وهومحرما
يالله انك تشافي كل جسمن سقيم=وعز الاسلام واهدي عبدك المسلما
يالبنادم ترا دنياك ما تستديم=والنهاية تجي من حيث لا نعلما
طيع ربك وعند الرب جنة نعيم=حاسب النفس في الدنيا وما تندما
ياهنا من لقي ربه بقلبن سليم=وياشقا من نهار العرض مايرحما