العين تشكي ياعـرب قلـة النـوم = طال السهد والوضع مزري وكايـد
قام السهر يهجم على طرفي هجوم = هجوم ناد العين فـي كـاس زايـد
دايم وغاراته على العيـن بسهـوم = حتى غدا نصـره عليهـا عوايـد
بسباب ود ٍ عشته وكـان مشـؤم = مع واحد ٍ ماشفـت بعـده فوايـد
اقفى وورث صورته داخـل البـوم = لـولاه والله ماكتبـت القصـايـد
قصة غرامي روحت كنهـا حلـوم = فيهـا كوابيـس العنـا والشدايـد
قصه جرت يشهد بها ليل وانجـوم = منها يشيبـون الصغـار الولايـد
لو تنشر الندوه على صفحة اليـوم = ماضنتي بالسـوق تبقـى جرايـد
ياناس دلوني علـى حـل مفهـوم = والراي يطلب من عقـول ٍ رشايـد
من بعد شرحي صاير الوضع معلوم = نبغى إفادة شخص منكـم محايـد

يا صقر لا تشكي الهوا تِقِل مكلوم=ترى الهوا يودع صويبه بدايد
طرد الجوازي كله الْكام و الْدوم= و جروح طاردها قبلهن جدايد
حتى لو انه من مشاكيل و قروم= بآخر مطافه يصبح الحيل بايد
ذي بنت حوّا طبعها المَيخْ و الزَّوم= هذي طبيعة لابسات القلايد
حاجاتها دايم تجيها بمرسوم= و العازه اللي عندها شي كايد
لو صار قلبك لاجلها كله ثلوم= و لو قلت فيها محكمات الشرايد
ما تستمع صوتك و لو جيت بسلوم= تسفه مناديها وهذي عوايد
ان طعتني طِرْ يا صقر و ابعد الحوم= واغسل هواها من خفوقك بتايد
البحر مليانٍ "سبيطي" وبه "عُوم"= اتعب على صيده و لو هو امْكايَد
هذي نصيحة واحدٍ جرّب الصّوم= عن حبهن و اصبح مع الوقت صايد

قريت خطك واصدر القلب مرسوم=وآنا في حزات الملازيم قايد
من يشتكي لي هم مايبات مظلوم =وما ارضى على مثلك تزيد الزوايد
والود مر وراعي الود مهموم=ما يهتني بالنوم فوق الوسايد
كم واحدن قبلك خرج منه محروم=وهذا الامر من سابق الوقت سايد
والبعض حصل فيه بسكت وحلقوم=وهذا من أللي يحكمون المصايد
من عامل اهل الود باسلوب محكوم=يجني من الود العسل والحصايد
ومن شاف من وده غماليج وعسوم=يصبر عليه ويرتجي منه عايد
الصبر مابين المودين معلوم=من سابق الايام طيب وفايد
ومن كان بعد الصبر ماشاف مقسوم=والود يتمادى معه في المكايد
ماهو على العيشة مع الود ملزوم=يستبدل دروبه دروبن جدايد
والله كريم ان شاف الانسان مظيوم=ينعم عليه بكل ما كان رايد

حنا عروبه ياصقر قوم في قوم = مانحقر الاعيان فوق الحدايد
نفزع وناسن مايعرفون للنوم = لن كان ماتدري تجيك الزوايد
واسمع شِكْات العين والطرف معلوم = يومي طلايب بينهم بالوقايد
شبعانه الاعيان والطرف محروم = والناتج إمخسر وماشي رقايد
تبدع مع الشعار بكلوم وكلوم = حسب الذي جتنا عليه النشايد
قصة غرام القلب والصد واللوم= قلت الصبر دايم يحل العقايد
راع السهر دايم من الطرف مدعوم =فيه الوساطه عاشقه بالوكايد
هذي حيات الود والود مبهوم = مايجهله من عاش بحر ومهايد
لاتحسبن الود بيبسي وجمجوم = الود ياقاري كلومي زهايد
والصبر لازم وانت بالصبر ملزوم = ولولا الصبر ماجاك قايد ورايد