يسيل دمع اللي من الحزن مكبـوت = دمع الحزين اللـي مفـارق شقيقـه
اصخفتني يامزعج الصوت مبهـوت = ياللي عيونك في دموعـك غريقـه
الوقـت مايهديـك لولـو وياقـوت = لابـد مايحكـم عليـنـا بضيـقـه
ماكل من قفـى تجيبـوه بالصـوت = والدمع مايشفـي جـروح ٍ عميقـه
من مات ماعوّد ومن عاش بيمـوت = سنـة حياتـك واقتنـع بالحقيقـه
فوق البسيطه ثوب الاحزان مسبوت = ومن حولك البلدان شبـت حريقه
بغداد مع غزه وكابل وبيروت = كم ودعت غالين باسوء طريقه
دنياك لو تقدر لها شوتهـا شـوت = لاترتجيهـا طبعهـا مـن يطيـقـه
دام السعاده تنحمـل فـوق تابـوت = كل العرب من وضعهـا مستضيقـه
يالله ياحامي نبيـك وسـط حـوت = وبالغـار نجيـت النبـي وصديقـه
اشوف في غزه سطت قلـة القـوت = وحصار دايرهـا حصونـه وثيقـه
جيش العدو حطم بها يقصف بيـوت = في ضل خوف وصمت كل الخليقـه
وارض العراق اللي بها الامن مفلوت = ارض الحضاره كيف راحت بويقـه
وكم طايره طارت توجـه بريمـوت = تطلق على كابـل سمـومٍ سحيقـه
ولبنان بنزينه على النـار مكتـوت = والوضع هذا مـن سنيـن ٍ عتيقـه
كل امة الاسلام في وضع مشتـوت = دايم علـى ظلـم العـدا مستفيقـه
يلعبها عدوانها لعب بالوت=سبـة تهاونـا وحـب المسيـقـه
والتفرقه منها غدا الريش محتـوت = لاصـار ماحـن الرفيـق برفيـقـه
يالله تامنـا مكـر كـل هلـفـوت = واخزي عدو الدين واخـزي فريقـه
واحفظ لنا امـن ٍ للانظـار ملفـوت = فـي ضـل حكـامٍ للاعـدا معيقـه
حكامنا اللي عندها جـاه وبخـوت = آل السعود اهـل القلـوب الشفيقـه
ناس ٍ على عز وشرف تلبس بشوت = بشوت ٍ قصبها ساطع ٍ فـي بريقـه
بقيادة اللـي رادع ٍ كـل عكـروت = مغـوار نفسـه للمعالـي عشيقـه
اللي غدا حكيـه بالانجـاز مثبـوت = هو ذخرنـا يـوم المنافـذ غليقـه
واختم واصلي عد ماينبـت التـوت = علـى النبـي واعدهـا بالدقيـقـه