اناعلى كثر مااشــــــــــــوف البنى ماهزني ميل = لوزانت أوصافــــها والبسوها دايم مجدة
ما غير بنت مولعنــــــــــــتى هواها زود بالحيل = في كل يوم يتزايد حبها شــــــوق ومودة
ماالد في ام الجدايل والعيون اللي مكاحــــــــيل = كل النظــــر يمــــــها والد لده بعــــد لده
بنت لك الله معـــــــي طول الدهر ماطالها الطيل = حتى بعد شاب راسي هي شباب ومستجدة
وان جيت في مجلس تبقا معي وسط الرجاجيل = دايم معي ماتفارقنـــي رخـــا وإلا في شدة
ام الجمايل يشــــــــــــرف نقلها فالصبح والليل = وان نمت حطيتها مابين راســي والمخدة
مكانها مجلســــــــــــي لاجا اللزوم اشيلها شيل = وتقول خذني معك مالي عن الماجوب صدة
لاجات ميلة من العقال والا من جهـــــاهيل = اللي نقل مثلــــــها فايز ولا ينباح ســـــــــد ه
هي عزوة اللي تعزوى في نهار العدل والميل = ترزم رزيم الرعد وقت الشدايد مستعــــدة
ماتشــــكي الجور صبارة ولو زو د لها الكيل = أرسل ولدها على قلب الهدف وان جات ضدة
واليا طرى القنص والمقناص رحنا بالتساهيل = أخذتها محتســــي ماتطلبه حسية وعـــــــــدة
ركبت جيب مضــــــرى للمساري والتهاويل = ماينهزع يوم ســـــواقه على العســــــرة يحده
اروح يم القرى ثم اخذ الديرة بتفصـــــــــيل = امشي مع الحرة اللي مابها درب و مجدة
الصــــيد يبغى ولد نشمي على الشدات حلحيل = ضاري لقطع الفيافي لانوى مااحـد يصـــده
وليا لقيت الســـــــمين اللي لها الحرة مداهيل = ارمي علـــو الكحـــــال ورميها كل يعـــــده
واخذت مايقسمه ربي وما جا من محا صيل = وان قام حظك خدمك وجاك كل اللي توده
رجعت عند المهيد وثم دنيت المعــــــاميل = شبيت ناري ومن جا للشبب مااحد يرده
وســـــوي القهوة اللي مكرمة بالبن والهيل = والطرقي اللي يبي من صيدنا قسمه نمده
نجلس نسولف تحت ضو القمر نضرب تماثيل = ماهي سوالف جهاز ماعرف مزحه وجده
خوياني بريك وابراهيم ومحمد مشــــــــاكيل = الكل منهم مدرّك فعل ابوه وفعل جده
يعجبك ســـبع الخلا لاراح يقنص يذبح الحيل = ماهو كما اللي ليا راح الخلا دمعه في خده
الناس تبغى الســــــــفر وتروح يم الهند والنيل = وانا تمشايتي فالبر ماهو سوق جـــــــــدة
عسى يجيها هليل الغيث ثم يعلها الســـــيل = ويزين مرباعها والخير ماينقاس حـده
واللي يحب البداوة ماعليـــــــه من الغرابيل = يالو بنى قصر فالحارة من البكرة يهــــده
ولي طلبة منك ياربي وانا باختم بها القيـــــل = الخير جبته لنا والشر نطلب منـــــك رده