حزّن تبوك وصار للورد سكرات = فجأه تساقط قبل يفقد جماله
من يوم هبتله مع النود نسمات =ماشمها راع الكرم والشكاله
والحزن عم الحزن كل اتجاهات= وحزن جنوب المملكه مع شماله
وللحزن في نجد العذيه علامات= وهذا حجاز العز تبكي جباله
لفراق ابو خالد حميد السجيات= اللي نهل عد المراجل وناله
وياعين هلي واذكري كل مافات = على الفقيد اللي يسرك قباله
ابكي على رابح وهلي بعبرات = افراق ابو خالد صعيب احتماله
مرحوم ياراع اليدين السخيات =يالله عساها جنة الخلد فاله
جزل العطايا ماحسب للعطيات = تنفق يمينه ماتعلم شماله
على اليتامى والمساكين بالذات = وعلى الذي مر الزمان ارتكاله
ودون القبيله بالأمور المهمات= يفزع ولو محدً يجيه وشكاله
وعسى البقى بأهل الفعول الحميدات =عياله اللي كل منهم دعاله
مامات من انجب على العز هامات= وعلى صلاح الدين فيهم كماله
بشرى رسول الله رب السموات= الجاريـــه تمشي ودعوة عياله
ويالله يامحيي العظام الرميمات =ظله بظلك ياعظيم الجلاله