خالد عبيد=
سلام مني لكم مرسول=يحمل لكم ورد مع كادي
يالصاحب اللي عليك القول=أغليك من داخل فؤادي
حامد الاحمدي=
اعداد مارش المطر وهطول=واعداد ماسال فالوادي
يامرحبا والغلا مبذول=ترحيب راقي مهو عادي
خالد عبيد=
هيا استمع ثم جيب حلول=للوضع يا ريس النادي
فاق السهد حده المعقول=وفارقت زادي مع رقادي
حامد الاحمدي=
أسمعك يالشاعر المأهول=واجيك يوم انك تنادي
هات الذي عندكم بكمول=يأتيك حلي مع ارشادي
خالد عبيد=
انا بلايه هوى مجمول=عقب على الكبد قدادي
باب الصفا بيننا مقفول=ويجازي الطيب بعنادي
حامد الاحمدي=
ياما عذاب الغرام يطول=راع الهوى دوم فجهادي
اللي زرع يجني المحصول=خلك على الصبر معتادي
خالد عبيد=
إن جيت ابشكي على المسئول=واشرح له الوضع ومرادي
تسجل قضيه على مجهول=ويفرح بما صار حسادي
حامد الاحمدي=
ماظن في المشتكى مفعول=لاتزيد في القلب لهادي
ان كان تبغى العذاب يزول=خل الأمل عندكم بادي
خالد عبيد=
ويش حيلة اللي غدا معلول=كثر الصبر فيه مافادي
مسكين في حالته مذهول=والود طاغي ومتمادي
حامد الاحمدي=
هيا استمع حلنا المشمول=وابعد عن العشق ياستادي
لاتصير في حالتك مملول=خلك على الموقف الهادي
عيش السعادة وفل فلول=وليل الآسى اتركه غادي
ويوم الفرح تعلنه بطبول=وختامها خالص ودادي

=
=

المشاركة الأصلية كتبت بواسطة مضحي بن جمران (المشاركة 386541) اخواني الشاعرين المبدعين خالد بن عبيد الاحمدي وزميله حامد الاحمدي صحت السنكم على هذه المحاوره الجزله لاهنتم على هذا الابداع بيض الله وجيهكم واهنيكم على هذا التميز وهذه الجزاله سلمتم ودمتم فالوجود اسجل اعجابي بكل ماسطرتم وتقبلومني صادق ودي وتقديري والله يحفظكم ويرعاكم

المشاركة الأصلية كتبت بواسطة بيان الصمت (المشاركة 386558) تسلم أخي الكريم حامد الأحمدي لقاء جمع بين عذوبة الأسلوب وطيب المعنى وصح لسانك ولسان الشاعر القدير صقر المراقيب وسلمت يمينك على هذا النقل وعافاك الله ورعاك