إلى بدا همي على قلبي يزيد= اوقتي على الاحزان دندن بزيره
انخا الصديق اللي على كل تأكيد= ياقف معي وقت الضروف العسيره
اقصد ولد غانم له افيد وآشيد= رجال حلاّل العقود الكبيره
لانه مجوّد ممسك العرف تجويد= رجال جرب لازم ٍ نستشيره
ربعه بهم نوماس وارجال اجاويد= غاراتهم مثل السهوم الخطيره
اهل الكرم والسيف واهل البواريد= فيهم ذرا للي فقد من يجيره
وحنا بني عم ٍ لكم يالمحاميد= والمشتكى مقبول بين العشيره
اسمع يانايف مابقوله وماافيد= عما حصل ماازيد كبر الشعيره
انا غرامي زاده الوقت تعقيد= زود ٍ على تعقيد شله شريره
اعطيتهم مَملك ومااخذت ماريد= وعرضت نفسي للسيوف الشطيره
طيبي لهم فايق على كل تحديد= لعيونهم جهدي على غير سيره
لكن يجازوني نكايه وتنكيد= حتى ابعدوا مضنون عيني بديره
قاموا يردونه بساليب تهديد= حتى احرموني منه حسد ٍ وغيره
ياما حبست الدمع مع فرحة العيد= من دون وصلي كن ساقه كسيره
وقلبي على الاخلاص قد جاه تعويد= وانا رجل صادق ومخلص ضميره
مجرده من نية السو تجريد= وذي ميزة ٍ فهل الوجيه السفيره
حظي من الاقدار في وضع تجميد= عيا مصيري يرتبط في مصيره
صبري عليها غير قابل لتمديد= كيف العمل قلي وكيف البصيره
واللي أمرنا في عباده وتوحيد= فيها حلايا من سماح وسميره
نصيبها بالحسن زايد عن الغيد= في خدها الكادي وبالفم شيره
وله عنق ريم ٍ زاد بالحسن تقليد= عقد ٍ من اصناف الذهب يستديره
وجديله اللي فوق الامتان تجعيد= تفوق ريح المسك ريحة عبيره
وافزع قبل يزداد وضعي بتصعيد= واصبح شهيد ٍ بالغرام وسعيره
واختم وصلي عد مايمشي البيد= على احمد المعصوم خير البريره