ياليل انا وياك من مدة اسنين= ابدي لك اسراري وتبدي لي اسرار
ياما تسامرنا ليالي وحيدين= ماكان ثالثنا صديق ٍ ولاجار
حنا غدينا من بعضنا قريبين= يشهد لنا بالولف نجم ٍ مع احجار
ياليل طبع مالك ٍ زين مع شين= سكتك يمشيها شجيع ٍ وغدار
وكم من سهربك حامي ٍ للميادين= وكم غادر ٍ ساريك في وقت الاسحار
ويلقى بك العشاق وعد وعناوين= مايسهرك ياغير عاشق ومحتار
ومشكى لمن صابه جنون المحبين= سهرتك مرغوبه وفيك التستار
ياليل انا واجهت عسر ٍ بعد لين= وقتي حرقني حرقة العود بالنار
ماكنت مؤمن بنقلاب الموازين= وكذبت من قالوا على الوقت دوار
ومن بعد ماواجهت فيه الامرين= آمنت بأن الوقت طاغي وجبار
خلا الحبايب يهجروني بعد حين= ماكنه الا واحد ٍ طالب الثار