ياكل همي ياعذاب إنتظاري= منك أحترق هم وجنون وغيره
ذكراك تشعل بالمعاليق ناري= وأنا أنطفي مثل الشموع المنيره
للحزن وألوانه بوجهي مواري= وإنتي سبب كل الجروح الكبيره
لإنك أول من سعى لإنتحاري= ولإنك أكثر من شغلني مصيره
أجيك وألقى بين الاعيان داري= وألقى لقلبي داخل القلب ديره
وألقى بصوتك مايرد إعتباري = عقب الظروف القاسيات المثيره
وأروح منك ولا اعرفه مساري= ( هو وين دربي ياسمو الاميره ) ؟؟
لاصرت احس الحزن ناوي دماري= وانتي تركتيني ذهول ٍ وحيره
ماغير أصفّق في يميني يساري= وصوت اليقين يقول : ( منصور خيره )
واقول خيره وأدري اني أماري= عيني بصيره والايادي قصيره
احاول انسى كل مامر طاري= بعض العباراااات الكبار المريره
وأقسى عبارة ساهمت بإنكساري= معها عرفت ان الحقيقة خطيره !!
(( ماني انا ليلى ولاني عذاري= أنا بحبك ياحبيبي أسيره ))
حبيبتي لو كان بيدي قراري= إن كان صرتي بالحياة الاخيره