إذا صاح الوريد وجاه دم الشعر بالإيجاب = وشفت المفرده تحبي على شطآن مغناها
أهيم وأغرق بجوي وأشوف لعالمي مرقاب = وأعاين بالحشى حبر وقريحة تشكي دواها
وأداعب بالقلم شوق المزون لسيلها السكاب = وأهز الكف وأحكي به حوادي جرت خطاها
أفل القاف وآخيطه وأشد بحبله الأطناب = وألملم باقي حروفه وأنقي جزل معناها
وأبهر دلة أفكاري وحبري لنارها شباب = وأصب بوسط فنجال الكرامه نبع يمناها
أنا اللي لا حكى تسكت بحور الشعر بالإعجاب = وتنطق صخرة العزة شموخ ونوف مرساها
كسبت الطيب والنخوة من جبال(ن) لها أبواب = مفاتيحه قبيله طالت العليا وسكناها
قبيلة حرب يا جود الوجود ونجمها ما غاب = ألا يا جوهرة أغلى من الألماس وقناها
بيارق لابتي تشمخ على آبانات فوق هظاب = ويرعد برقها بإسم الشهامه وانحدر ماها
ملينة الحديد ولا يلين المعتدي بعتاب = يلين عظمه القاسي مضارب حرب بعداها
بواردها وسوم الموت والناجي بعدها تاب = يحرم حمل باروده بوجه الحرب لا جاها
وإذا حمي الوطيس سيوف قومي تنشد المخضاب = تمرغ في حشى صدر المعادي حدة براها
ومدفع ربعتي يقنص جزيلات الفعل لا صاب = فتيله يشعله نار المراجل يوم تنصاها
وإذا فاح الكرم والجود قومي منبع الأطياب = يفوح المسك والعنبر من ثياب(ن) تِقدٌاها
خيول(ن) من ظهر خيل(ن) تعلى صهوة المرقاب = يسابق بالخُطى ريح الشجاعه ثم تعداها
وكل(ن) لا غرف دلوه نضح طيب وسقى أشناب = وكل(ن) بالمعارك له فعول(ن) وسط بيداها
ولكن واجبي يملي أسطر لابتي بكتاب = كتاب(ن) للفخر رمز وحروفه واجب أقراها
وعلى يم الطوارق سقت ينبوع الفكر مركاب = مجاديفه شعور(ن) صادق(ن) يسكن محياها