مطـلق:=
ابا اتعبك ياصياف وارتاح يامستور=واهز السحيمي لين يهتز ميزانه
ولا ابغاه يبقى ضابط فاول الطابور=وميدان فيه الحرب ماهو بميدانه
صـــــــــياف:=
انا في عذابك يالثبيتي سنة وشهور=ولكن الدهر يضرب براسه وكرعانه
اشوفك تغني بالمسارح وأنا مقهور=ياليت المغني في يدي واقطع لسانه
مطـــلق:=
إلي بيرقٍ عالي وطول الدهر منصور=وانا ماشريت البندق إلا على شانه
ليا شفت لي واحد عوج صنعة الباكور=اخلّيه يجلس مع حريمه وورعانه
صـــــــــياف:=
أنا عارف انّك تحمل البيرق المعمور=ولكن إلى ذا الحين يطلبك ديانه
ترانا ليا جينا الجبل ماتطير اطيور=ياغار الطوار (1) اللي يرفرف بجنحانه
مطـــلق:=
أخلّيه فالمينا واسافر على البابور=أبو عكة ماهي من السمن مليانه
يدور الفلك لين الليالي عليك ادّور =ويطلع لك الفارس بشلفاه وحصانه
صـــــــــياف:=
على نيّتك تمشي يامنهي ويامامور=ويالطرقي العجلان الايام عجلانه
أنا عارف إنك عقرب مَدَت الدنقور=تدوّر على المسلم تبي مسك لحيانه
مطـــلق:=
عسى الله يقطع شوفت الذيب ابو حنجور=عيونه لها مدة من الدمع غرقانه
لياليك ماهي كلهنه فرح وسرور=تدور الليالي فوق ضينك ورعيانه
صـــــــــياف:=
لو إنك غريب بلا وطن قلت لك ماجور=لكنّك سعودي عند ورده وريحانه
ألا ياكثر ماتهرج الناس ظلم وزور=يسبّون فالتاجر على شان دكانه