يامرحبا واهلين والله يحيك=يا شاعرن عسر المواقف حماها
كتبت لك خطن يقدم له الشيك=مثل الجواهر ما لقينا حلاها
قريت خطك بعدها قلت اقهويك=من دلتن تسعالها من غناها
فنجالها يبري عظامك ويبريك=من علتن يصعب عليكم دواها
ما كنت احسب الشك يقطن باراضيك=او تشتبه فيها وتخطي خفاها
مثلك علومه غانمه دون تشكيك=ابيض وجه حاول يصحح خطاها
السالفه حصلت ولا عاد يمديك=وما فات مات وكل نفس وهواها
يعني عشانه واحدن من بنيخيك=ادمح له الزله واكابد عناها
لا والله الا هم عينه وانا اخيك=طبع الرديه تفضح اللي شراها
احدن على ربعه يجيب الشرابيك=يزعل بها الصاحب ويفرح اعداها
واحدن علومه لا توحيت تغريك=تنشد عن انسابه وتمدح نباها
واحدن نظف سنه بفعل المساويك=حرم على السوسه تلاقي عشاها
والعالم الله في حياة الصعاليك=ضاعت سلوم و عظم الله عزاها
جاب الخطا قلبي ولا هو مناجيك=ورسالتي بالعرف قلبي قراها
ينصت ويصرخ لي هلا فيك لبيك=ورسالتي له بالمواقف لقاها
لابوك ياقلبن تغرك هقاويك=باهل الوجيه اللي خفين غثاها
لو ادري انه للرديه يهاديك =ما كان نال الطيبه في بناها
جاب الردي يسرج خيوله ويشنيك=وبل الكبود اللي طويلن ضماها
ياقلب هون وش تسوي عزاويك=بالعزوه اللي ما شملنا عطاها
خلك على ربك وربك بيغنيك =عن فزعتن تاتي بليا عصاها