يا ابن آدم ارضى باللي الله قسم لك=إرضى لعلك تدرك الخيـر برضـاك
تراك لو كل الربـوع تحشـم لـك=ماتسلـم الا كـان خلاقـك انجـاك
وان كان ماربك بفضله زهـم لـك=وان كان ماربك من ارزاقه اعطـاك
والله لو ان الخير مر وخطـم لـك=إنـك فـلا تقـدر تطولـه بيمنـاك
الله قسم لك ثـم خـط القلـم لـك=باللوح سجـل سيئاتـك وحسنـاك
وان كان مارب البريـه رحـم لـك=ماينفـعـك هـــذا ولاذا ولاذاك
لايغرك اللي بالفـرج يبتسـم لـك=وبساعة الضيقـات مـر وتعـداك
ناسٍ تدس السم وصط الدسـم لـك=ويضحكونك ليـن يصلـون لبكـاك
تخيـر ربـوعٍ بوقـت اللـزم لـك=لاشك لاتامن علـى سـرك الـلاك
يوم الله أعطاك البصيره وفـم لـك=إختار لاسنانك من الـراك مسـواك
ناسٍ تشيـل الحمـل لازاد حملـك=لو يخسرون الروح قالـوا فدايـاك
واكرم رفيقٍ لك يحـب الكـرم لـك=واستر رفيقٍ كان يستـر خطايـاك
وافهم رفيقٍ لانصحتـه فهـم لـك=واتـرك رديٍ لانصحتـه تبلـواك
واختر جليسك ثم حطـه علـم لـك=ترى جليسك لازم يصيـر شـرواك
اما معه طيب وعطاك وقسـم لـك=والا تشم الطيـب ويطيـب ملفـاك
والا معـه كيـر وتعمـد بطمـلـك=والا الشرار المنبعث منـه ملـلاك
وترى المقدر يصلك.اما جهـم لـك=والا سريت وهو سرى وقت مسراك